Axborot va ommaviy kommunikatsiyalar agentligida “Reklama qonunchiligi ijrosi: ommaviy axborot vositalari faoliyati misolida” mavzusida o‘quv-seminari bo‘lib o‘tdi. Bu haqda agentlik matbuot xizmati ma’lum qildi.
Monopoliyaga qarshi kurashish qo‘mitasi hamkorligida o‘tkazilgan o‘quv-seminarda davriy bosma nashrlar, teleradiokanallarning rahbarlari, marketing va reklama yo‘nalishi bo‘yicha mutaxassislari ishtirok etdi. Tadbirda bosma va elektron ommaviy axborot vositalarida O‘zbekiston Respublikasining “Reklama to‘g‘risida”gi Qonuni talablari buzilishi bilan bog‘liq holatlar tahlil qilindi.
Unda agentlik tomonidan o‘tkazilgan monitoring jarayonida ayrim bosma va elektron ommaviy axborot vositalarida reklama qonunchiligi talablari buzilayotgani, mazkur qonunbuzilishlar, asosan, yashirin reklama, reklama xarakteridagi dasturlarni reklama ruknida joylashtirilmaslik, homiylik ko‘rsatilishi borasida belgilangan talablarga rioya etilmaslik, teleko‘rsatuvlar boshlovchilarining reklama uchun ajratilgan vaqtdan tashqari paytda mahsulotni reklama qilishi bilan bog‘liq holatlardir.
Tadbirda qayd etilganidek, Prezidentning 2019-yil 11-sentabrda qabul qilingan “Iste’molchilar huquqlarini himoya qilishning huquqiy va institutsional tizimini tubdan takomillashtirish chora-tadbirlari to‘g‘risida”gi farmoniga asosan Monopoliyaga qarshi kurashish qo‘mitasi huzurida Iste’molchilar huquqlarini himoya qilish agentligi tashkil etilgan bo‘lib, uning asosiy vazifalaridan biri etib, iste’molchilar huquqlarini himoya qilish va reklama bozorini tartibga solish sohasida yagona davlat siyosatini ishlab chiqish va amaliy ijrosini ta’minlash belgilangan.
Monopoliyaga qarshi kurashish qo‘mitasi boshqarma boshlig‘i Dilshod Azimov mazkur farmonning mazmun-mohiyati, shuningdek, reklamani huquqiy tartibga solish va undagi taqiqlar xususida so‘z yuritdi.
— Har qanday reklama axborotdir, — dedi Azimov. — Shunday ekan, har bir reklama materialida taqdim etilayotgan axborot to‘g‘ri va qonunchilikka muvofiq bo‘lishi zarur. Xususan, reklama materialida targ‘ib etilayotgan mahsulot va xizmatlarning sertifikat yoki litsenziyaga ega ekaniga ahamiyat qaratish, narxlar haqidagi ma’lumotlarni milliy valyutada berish, qiyosiy hamda turli aksiyalar shaklidagi reklamalardagi qonun buzilishlarga barham berish kabi masalalarga ko‘proq e’tibor qaratish darkor.
Izoh (0)