Ахборот ва оммавий коммуникациялар агентлигида «Реклама қонунчилиги ижроси: оммавий ахборот воситалари фаолияти мисолида» мавзусида ўқув-семинари бўлиб ўтди. Бу ҳақда агентлик матбуот хизмати маълум қилди.
Монополияга қарши курашиш қўмитаси ҳамкорлигида ўтказилган ўқув-семинарда даврий босма нашрлар, телерадиоканалларнинг раҳбарлари, маркетинг ва реклама йўналиши бўйича мутахассислари иштирок этди. Тадбирда босма ва электрон оммавий ахборот воситаларида Ўзбекистон Республикасининг «Реклама тўғрисида»ги Қонуни талаблари бузилиши билан боғлиқ ҳолатлар таҳлил қилинди.
Унда агентлик томонидан ўтказилган мониторинг жараёнида айрим босма ва электрон оммавий ахборот воситаларида реклама қонунчилиги талаблари бузилаётгани, мазкур қонунбузилишлар, асосан, яширин реклама, реклама характеридаги дастурларни реклама рукнида жойлаштирилмаслик, ҳомийлик кўрсатилиши борасида белгиланган талабларга риоя этилмаслик, телекўрсатувлар бошловчиларининг реклама учун ажратилган вақтдан ташқари пайтда маҳсулотни реклама қилиши билан боғлиқ ҳолатлардир.
Тадбирда қайд этилганидек, Президентнинг 2019 йил 11 сентябрда қабул қилинган «Истеъмолчилар ҳуқуқларини ҳимоя қилишнинг ҳуқуқий ва институционал тизимини тубдан такомиллаштириш чора-тадбирлари тўғрисида»ги фармонига асосан Монополияга қарши курашиш қўмитаси ҳузурида Истеъмолчилар ҳуқуқларини ҳимоя қилиш агентлиги ташкил этилган бўлиб, унинг асосий вазифаларидан бири этиб, истеъмолчилар ҳуқуқларини ҳимоя қилиш ва реклама бозорини тартибга солиш соҳасида ягона давлат сиёсатини ишлаб чиқиш ва амалий ижросини таъминлаш белгиланган.
Монополияга қарши курашиш қўмитаси бошқарма бошлиғи Дилшод Азимов мазкур фармоннинг мазмун-моҳияти, шунингдек, рекламани ҳуқуқий тартибга солиш ва ундаги тақиқлар хусусида сўз юритди.
— Ҳар қандай реклама ахборотдир, — деди Азимов. — Шундай экан, ҳар бир реклама материалида тақдим этилаётган ахборот тўғри ва қонунчиликка мувофиқ бўлиши зарур. Хусусан, реклама материалида тарғиб этилаётган маҳсулот ва хизматларнинг сертификат ёки лицензияга эга эканига аҳамият қаратиш, нархлар ҳақидаги маълумотларни миллий валютада бериш, қиёсий ҳамда турли акциялар шаклидаги рекламалардаги қонун бузилишларга барҳам бериш каби масалаларга кўпроқ эътибор қаратиш даркор.
Изоҳ (0)