“Nuz.uz” Namangan viloyatidagi chiqindi uyumlariga mutasaddi shaxslar e’tiborini jalb etishga urindi. Quyida nashr tomonidan chop etilgan maqola e’tiboringizga havola etiladi.
Namanganni gullar shahri deyishadi. Haqiqatan ham Bobur nomidagi madaniyat va istirohat bog‘ini, uning atrofidagi ko‘chalarni aylansangiz, rang-barang gullarni, atrofdagi ozodalik va saranjom-sarishtalikni ko‘rib, bahri-dilingiz ochiladi. Ammo ayrim joylar ham borki, holatga boqib, hayratdan yoqa ushlaysiz.
Hamroh va Istiqlol ko‘chalari tutashgan burchakdan yaqin orada o‘tgan namanganliklar va shahar mehmonlarining og‘iz-burunlarini berkitishdan o‘zga choralari yo‘q. Chunki bu yerdagi axlatxona haftalab tozalanmaydi. Aholi olib chiqib tashlagan narsalar orasida achiydigan va sasiydiganlari ham bor. Ularning qo‘lansa hidi atrofni tutgan. Kasallik tarqatuvchi pashshalar g‘ujg‘on o‘ynaydi. Bunday noxush holatdan aholi nihoyatda aziyat chekmoqda.
“Uyimiz mana shu axlatxonadan ellik-oltmish metr narida. Bu yerdan tarqalayotgan badbo‘y hidlarga, pashshalar xurujiga toqat qilib bo‘lmayapti. MFY raisi Sohibaxon Xolmirzayevaga bir necha marotaba murojaat qildik. Lekin hozirgacha hech qanday natija chiqmadi. Hokimlik mutasaddilari, sanitariya nazorati, obodonlashtirish boshqarmasi, ‘Toza hudud’ korxonasi vakillarining ham parvoyi falak”, — deydi “Nurafshon” mahallasi fuqarosi Malikaxon Ergasheva.
Malikaxon opaning fikrlarini Munavvarxon G‘afurova, Munavvarxon Sattorova, Tursunxon Turg‘unova kabi qo‘ni-qo‘shnilar ham tasdiqladi.
Shahar hokimligi va tegishli tashkilotlarning mutasaddilari tezda zarur choralarni ko‘rib, “Nurafshon” mahallasidagi ekologik vaziyatning yaxshilanishini ta’minlaydi, deb o‘ylaymiz.
Izoh (0)