Indoneziya prezidenti Joko Vidodo mamlakatda hukumatning yangi tarkibiga Papua hamda G‘arbiy Papua provinsiyalaridan yana bir tub aholi vakili kiritilishini va’da qildi. Bu haqda Regnum xabar berdi.
“Men hukumatning yangi tarkibida yana papualiklar bo‘lishini o‘z nazoratimga olaman”, — deya qayd etgan Indoneziya prezidenti Yangi Gvineya orolida talabalar bilan o‘tkazilgan uchrashuv vaqtida. Ammo davlat rahbari papualiklar vakili qanday lavozimni egallashi va Vazirlar mahkamasida qaysi masalalar bilan shug‘ullanishiga aniqlik kiritmagan.
Mavzuga doir: Indoneziya xavfsizlik vaziriga suiqasd uyushtirildi
Indoneziya hukumatining amaldagi tarkibida bir nafar papualik bor, u ayollar imkoniyatlarini kengaytirish va bola huquqlarini himoya qilish masalalari bo‘yicha vazir Yohana Susane Yembise.
Sentabrda Papua va G‘arbiy Papuada norozilik namoyishlari o‘tkazilgan, natijada 30 nafar odam halok bo‘lgan, o‘nlab fuqarolar turli tan jarohatlari olgandi. Noroziliklarga asosiy sabab boshqaruv hukumatining papualiklarga nisbatan millatchilik qilayotgani xabar qilingan. Shuningdek, hududda “Ozod Papua” harakati faoliyat olib boradi va ular viloyatning Indoneziyadan mustaqil davlat sifatida ajralib chiqishi uchun kurashadi.
1961-yilda Niderlandiya koloniyasi bo‘lgan Papua o‘z mustaqilligini e’lon qilgan, ammo 1969-yilga kelib Indoneziya hududda o‘z nazoratini o‘rnatgan va hozirgacha Papuani o‘z hududiy qismi sifatida boshqarib keladi. Papuaga 2003-yilda Indoneziya avtonom viloyati maqomi berilgan.
Izoh (0)