Индонезия президенти Жоко Видодо мамлакатда ҳукуматнинг янги таркибига Папуа ҳамда Ғарбий Папуа провинцияларидан яна бир туб аҳоли вакили киритилишини ваъда қилди. Бу ҳақда Regnum хабар берди.
«Мен ҳукуматнинг янги таркибида яна папуаликлар бўлишини ўз назоратимга оламан», — дея қайд этган Индонезия президенти Янги Гвинея оролида талабалар билан ўтказилган учрашув вақтида. Аммо давлат раҳбари папуаликлар вакили қандай лавозимни эгаллаши ва Вазирлар маҳкамасида қайси масалалар билан шуғулланишига аниқлик киритмаган.
Мавзуга доир: Индонезия хавфсизлик вазирига суиқасд уюштирилди
Индонезия ҳукуматининг амалдаги таркибида бир нафар папуалик бор, у аёллар имкониятларини кенгайтириш ва бола ҳуқуқларини ҳимоя қилиш масалалари бўйича вазир Йохана Сусана Йембисе.
Сентябрда Папуа ва Ғарбий Папуада норозилик намойишлари ўтказилган, натижада 30 нафар одам ҳалок бўлган, ўнлаб фуқаролар турли тан жароҳатлари олганди. Норозиликларга асосий сабаб бошқарув ҳукуматининг папуаликларга нисбатан миллатчилик қилаётгани хабар қилинган. Шунингдек, ҳудудда «Озод Папуа» ҳаракати фаолият олиб боради ва улар вилоятнинг Индонезиядан мустақил давлат сифатида ажралиб чиқиши учун курашади.
1961 йилда Нидерландия колонияси бўлган Папуа ўз мустақиллигини эълон қилган, аммо 1969 йилга келиб Индонезия ҳудудда ўз назоратини ўрнатган ва ҳозиргача Папуани ўз ҳудудий қисми сифатида бошқариб келади. Папуага 2003 йилда Индонезия автоном вилояти мақоми берилган.
Изоҳ (0)