Qozog‘istonda chaqaloq “o‘lik tug‘ilgan” degan hujjatni o‘zgartirmaslik uchun shifokorlar uni sovutgichda qoldirdi

Qozog‘istonning Atirau shahridagi perinatal markaz shifokorlari rahbar ko‘rsatmasiga binoan tirik chaqaloqni sovutgich kamerasida qoldirdi. Bu haqda mamlakat korrupsiyaga qarshi kurash agentligi rais o‘rinbosari Chingiz Abdulla ma’lum qildi.

Bunga hujjatni qayta o‘zgartirishni istamaganlik sabab sifatida ko‘rsatilmoqda: chaqaloq xato tufayli “o‘lik tug‘ilgan” deb rasmiylashtirilgandi.

Ma’lum bo‘lishicha, 29-sentabrda viloyat perinatal markazida tug‘ruqdan keyin hayot alomatlari sezilmagan chaqaloq dunyoga keladi va u o‘lik tug‘ilgan sifatida rasmiylashtiriladi. Sovutgich kamerasiga eltish chog‘ida chaqaloqning oyog‘i qimirlaydi. Shunda akusher-ginekolog bosh shifokor Kuanish Nisonboyevga qo‘ng‘iroq qiladi, u esa “yaxshisi, sovutgichda qoldirish”ni maslahat beradi.

Nisonboyevning telefoni korrupsiyaga qarshi kurash agentligi xodimlari tomonidan eshitilayotgandi. U Sud-tibbiy ekspertizasi instituti direktoriga bir necha bor pora berganlikda gumon qilingan. Natijada chaqaloqning o‘limi holati ham fosh etildi.

Holat yuzasidan qotillik bo‘yicha jinoiy ish ochildi. Tug‘ruqxona rahbari va tug‘ruqni qabul qilgan akusher-ginekolog 20 yilgacha bo‘lgan muddatga ozodlikdan mahrum etilishi mumkin.