Қозоғистоннинг Атирау шаҳридаги перинатал марказ шифокорлари раҳбар кўрсатмасига биноан тирик чақалоқни совутгич камерасида қолдирди. Бу ҳақда мамлакат коррупцияга қарши кураш агентлиги раис ўринбосари Чингиз Абдулла маълум қилди.
Бунга ҳужжатни қайта ўзгартиришни истамаганлик сабаб сифатида кўрсатилмоқда: чақалоқ хато туфайли «ўлик туғилган» деб расмийлаштирилганди.
Маълум бўлишича, 29 сентябрда вилоят перинатал марказида туғруқдан кейин ҳаёт аломатлари сезилмаган чақалоқ дунёга келади ва у ўлик туғилган сифатида расмийлаштирилади. Совутгич камерасига элтиш чоғида чақалоқнинг оёғи қимирлайди. Шунда акушер-гинеколог бош шифокор Куаниш Нисонбоевга қўнғироқ қилади, у эса «яхшиси, совутгичда қолдириш»ни маслаҳат беради.
Нисонбоевнинг телефони коррупцияга қарши кураш агентлиги ходимлари томонидан эшитилаётганди. У Суд-тиббий экспертизаси институти директорига бир неча бор пора берганликда гумон қилинган. Натижада чақалоқнинг ўлими ҳолати ҳам фош этилди.
Ҳолат юзасидан қотиллик бўйича жиноий иш очилди. Туғруқхона раҳбари ва туғруқни қабул қилган акушер-гинеколог 20 йилгача бўлган муддатга озодликдан маҳрум этилиши мумкин.
Изоҳ (0)