Oliy Majlis Qonunchilik palatasi saytida deputat Yormamat Xoliyorovning “Toshkent metropoliteni jetonlardan qachon voz kechadi?” sarlavhali maqolasi e’lon qilingan edi.
Maqolada deputat barcha sohada kechayotgan yangilanishlar, zamonaviylik Toshkent metropolitenini chetlab o‘tayotgani, bugun butun dunyoda elektron to‘lovlar tizimi keng qo‘llanilayotgani, hattoki, mobil smartfonlarga o‘rnatiladigan dasturlar orqali NFC to‘lov tizimlari joriy etilayotganini keltirib, Toshkent metropolitenida esa hali-hanuz jetonlardan foydalanilayotgani, bu kabi masalalarga yetarlicha e’tibor qaratilmayotgani, eskicha qarashlardan voz kecha olinmayotgani haqidagi masalani ko‘targan edi.
Maqola e’lon qilingach, ushbu masala jamoatchilik o‘rtasida keng muhokama keltirib chiqargan. Bu masalaga hatto hukumat ham e’tibor qaratgan.
Parlament quyi palatasi saytida qayd etilishicha, maqola muallifi bo‘lgan deputat nomiga “O‘zbekiston Temir yo‘llari” aksiyadorlik jamiyati “Toshkent metropoliteni” unitar korxonasi rahbariyatidan javob xati kelgan.
Maktubda ushbu masalani bosh vazir o‘z nazoratiga olgani va taalluqli bo‘lgan vazirliklarga topshiriqlar berilib, ishchi guruhi tuzilgani, ishchi guruh zimmasiga Yevropaning yetakchi mamlakatlari transport tarmoqlarida amal qilayotgan elektron to‘lov tizim joriy etish bo‘yicha amaliy taklif kiritish yuklatilgani hamda bu borada amaliy harakatlar boshlangani bayon qilingan.
Shuningdek, xatda keltirilishicha, hozirgi paytda Toshkent metropolitenining “Xalqlar do‘stligi” va “Oybek” bekatlarida tajriba asosida HUMO pul to‘lov kartalari orqali yo‘lkira haqini to‘lashni amalga oshirish imkonini yaratuvchi tizim muvaffaqiyatli sinovdan o‘tkazilgan.
Bundan tashqari 2019-yilning sentabr oyining o‘rtasidan boshlab tasdiqlangan reja asosida Toshkent metropolitenining Chilonzor yo‘nalishining “Olmazor”, “Chilonzor”, “Mirzo Ulug‘bek”, “Paxtakor”, “Buyuk ipak yo‘li” bekatlarida, O‘zbekiston yo‘nalishining “Do‘stlik”, “Toshkent”, “O‘zbekiston”, “Alisher Navoiy”, “Chorsu”, “Beruniy” bekatlarida va Yunusobod yo‘nalishining barcha bekatlariga HUMO pul to‘lov kartalari orqali yo‘lkira haqini to‘lashni amalga oshirish imkonini yaratuvchi tizim o‘rnatilib, bosqichma-bosqich ishga tushirilayotgani aytilgan.
Izoh (0)