Buxoro hokimligi Kogonda maktab o‘quvchilari paxta terimiga jalb etilgani yuzasidan rasmiy munosabat bildirdi

Hokimlik matbuot xizmatining ma’lum qilishicha, Kogon tumanidagi 15-umumiy o‘rta ta’lim maktab o‘quvchilarining paxta yig‘im-terimiga majburiy tarzda jalb etilganligi qanchalik haqiqatga yaqinligiga oydinlik kiritish maqsadida maxsus ishchi guruhi tomonidan dastlabki o‘rganish ishlari olib borilgan.

O‘rganish yakunlariga ko‘ra, maqolada tilga olingan jihatlar uydirmadan boshqa narsa emasligi ma’lum bo‘lgan. Buni mutasaddilar o‘z fikrlari bilan tasdiqlagan.

Jamol Saidov, Kogon tumanidagi 15-umumiy o‘rta ta’lim maktabi direktori:

Sir emas, ilgari o‘qituvchilar qishloq xo‘jaligi, ayniqsa, paxta yig‘im-terimiga keng jalb etib kelingan. Ammo so‘nggi yillarda davlat rahbariyati, viloyat hokimligining o‘qituvchilarning paxta yig‘im-terimiga jalb etilmasligi haqidagi topshiriqlari barcha ziyolilar singari bizni ham juda xursand qildi. Shundan kelib chiqib aytmoqchimanki, maktabimiz o‘quvchilarini paxta yig‘im-terimiga jalb etish bo‘yicha hech qanday topshiriq olmaganmiz. Ijtimoiy tarmoqlarda tarqalgan xabar bu bizga qilingan tuhmat. Maqolada 15-maktab o‘quvchilari va o‘qituvchilari, hatto, 1-oktabr kuni ham paxta yig‘im terimida ishtirok etganligi aytib o‘tilgan. Vaholanki, 1-oktabr kuni “O‘qituvchi va murabbiylar kuni” munosabati bilan tashkil etilgan bayram sayillarida ishtirok etdik. Biz jamoamiz bilan mutasaddi tashkilotlardan ushbu uydirmani tarqatganlarga nisbatan javobgarlik masalasini hal etishlarini so‘raymiz.

Ijtimoiy tarmoqlarda Kogon tumanidagi 15-umumiy o‘rta ta’lim maktabi o‘quvchilarining paxta yig‘im-terimiga majburiy tarzda jalb etilganligi bo‘yicha xabar tarqalgandan so‘ng o‘zim boshchilik maxsus guruh holatni joyida o‘rgandik. O‘rganishda maktab jamoasi va o‘quvchilarning paxta yig‘im-terimiga majburiy tarzda jalb etilganlik holati o‘z tasdig‘ini topmadi. Bugun davlatimiz rahbari tomonidan xalq ta’limi sohasida mehnat qilayotgan o‘qituvchi va murabbiylarga qaratilayotgan e’tibordan ruhlanib, yosh avlod ta’lim tarbiyasi bilan doimiy tarzda shug‘ullanyapmiz. Mana ikki yildirki butun mamlakatimizda bo‘lgani kabi Buxoro viloyatida ham xalq ta’limi tizimi xodimlari va o‘quvchi yoshlari paxta yig‘im terimi, turli hashar va obodonlashtirish ishlariga jalb etilmayapti. Xalq ta’limi vazirligi va boshqarmamiz majburiy mehnatning har qanday ko‘rinishiga mutlaqo qarshi hamda tizimda faoliyat ko‘rsatayotgan pedagoglarning o‘z kasbiga aloqasi bo‘lmagan turli ishlarga jalb qilinishiga yo‘l qo‘ymaydi. Sohada xizmat qilayotgan fidoyi ustoz va murabbiylarning mehnatini qadrlash, ularni har tomonlama qo‘llab-quvvatlash, jamiyatda ustoz obro‘sini oshirish yo‘lidagi ishlarini davom ettiramiz. Qonunchiligimizda belgilangan mehnat munosabatlariga oid huquqiy normalarga so‘zsiz amal qilamiz.

Amrillo Safarov, viloyat hokimligi xalq ta’limi boshqarmasi boshlig‘i

Kogon tumanida hozirda 22 ta maktabda 12 ming 63 nafar o‘g‘il-qiz tahsil olmoqda. Keyingi yillarda Prezidentimiz tomonlaridan xalq ta’limi sohasini isloh qilish, o‘qituvchi va o‘quvchilarni ijtimoiy qo‘llab-quvvatlash, xususan, ularni o‘qish, o‘qitishdan tashqari har qanday ko‘rinishdagi yumushlarga jalb qilmaslik bo‘yicha amalga oshirilayotgan ishlar ta’lim sifatini oshirishga xizmat qilayotganini hech bir so‘z bilan ta’riflab bo‘lmaydi. Bugun ijtimoiy tarmoqlarda keng quloch yoygan tumanimizdagi 15-o‘rta umumta’lim maktabi o‘quvchilarining paxta yig‘im-terimiga olib chiqilganligi haqidagi yolg‘on xabar esa nafaqat Buxoro, balki butun mamlakatimiz xalq ta’limi tizimi xodimlari sha’niga otilgan toshdir.

Bahrom Qurbonov, Kogon tumani xalq ta’limi bo‘limi mudiri

Ijtimoiy tarmoqlarda Kogon tumanida maktab o‘quvchilarining dam olish va bayram kunlari paxta yig‘im-terimiga majburiy jalb etilayotganligi mazmunidagi xabarlar yuzasidan bu borada nafaqat ta’lim tizimi o‘quvchilari, balki umuman, budjet tashkilotlari xodimlari va fuqarolarimizning bunday ko‘rinishdagi mehnatga jalb qilish to‘g‘risida biror bir ko‘rinishda topshiriq berilmagan. Aksincha, barcha budjet tashkiloti hamda mutasaddi idoralarga paxta yig‘im-terimiga majburiy jalb etilishini taqiqlash haqida yozma topshiriq berilgan.

Kogon tumani hokimligi