Олий Мажлис Қонунчилик палатаси сайтида депутат Ёрмамат Холиёровнинг «Тошкент метрополитени жетонлардан қачон воз кечади?» сарлавҳали мақоласи эълон қилинган эди.
Мақолада депутат барча соҳада кечаётган янгиланишлар, замонавийлик Тошкент метрополитенини четлаб ўтаётгани, бугун бутун дунёда электрон тўловлар тизими кенг қўлланилаётгани, ҳаттоки, мобил смартфонларга ўрнатиладиган дастурлар орқали NFC тўлов тизимлари жорий этилаётганини келтириб, Тошкент метрополитенида эса ҳали-ҳануз жетонлардан фойдаланилаётгани, бу каби масалаларга етарлича эътибор қаратилмаётгани, эскича қарашлардан воз кеча олинмаётгани ҳақидаги масалани кўтарган эди.
Мақола эълон қилингач, ушбу масала жамоатчилик ўртасида кенг муҳокама келтириб чиқарган. Бу масалага ҳатто ҳукумат ҳам эътибор қаратган.
Парламент қуйи палатаси сайтида қайд этилишича, мақола муаллифи бўлган депутат номига «Ўзбекистон Темир йўллари» акциядорлик жамияти «Тошкент метрополитени» унитар корхонаси раҳбариятидан жавоб хати келган.
Мактубда ушбу масалани бош вазир ўз назоратига олгани ва тааллуқли бўлган вазирликларга топшириқлар берилиб, ишчи гуруҳи тузилгани, ишчи гуруҳ зиммасига Европанинг етакчи мамлакатлари транспорт тармоқларида амал қилаётган электрон тўлов тизим жорий этиш бўйича амалий таклиф киритиш юклатилгани ҳамда бу борада амалий ҳаракатлар бошлангани баён қилинган.
Шунингдек, хатда келтирилишича, ҳозирги пайтда Тошкент метрополитенининг «Халқлар дўстлиги» ва «Ойбек» бекатларида тажриба асосида HUMO пул тўлов карталари орқали йўлкира ҳақини тўлашни амалга ошириш имконини яратувчи тизим муваффақиятли синовдан ўтказилган.
Бундан ташқари 2019 йилнинг сентябрь ойининг ўртасидан бошлаб тасдиқланган режа асосида Тошкент метрополитенининг Чилонзор йўналишининг «Олмазор», «Чилонзор», «Мирзо Улуғбек», «Пахтакор», «Буюк ипак йўли» бекатларида, Ўзбекистон йўналишининг «Дўстлик», «Тошкент», «Ўзбекистон», «Алишер Навоий», «Чорсу», «Беруний» бекатларида ва Юнусобод йўналишининг барча бекатларига HUMO пул тўлов карталари орқали йўлкира ҳақини тўлашни амалга ошириш имконини яратувчи тизим ўрнатилиб, босқичма-босқич ишга туширилаётгани айтилган.
Изоҳ (0)