Бухоро вилоятининг Когон туманида мактаб ўқувчилари пахта теримига жалб этилмоқда. Бу ҳақда Repost ўз манбаларига асосланиб хабар берди.
Қайд этилишича, пахта даласига бешинчи ва ундан юқори синф ўқувчилари олиб чиқилган.
Мавзуга доир: Ўнлаб ички ишлар ходимлари мажбурий пахта теримига қарши норозлик билдиришмоқда (видео)
«Алиноз Шергиноз» ва «Барно Баҳром» фермер хўжаликларига тегишли пахта далаларида 13 нафар бешинчи ва ундан юқори синф ўқувчилари пахта тераётган бўлган.
«Отам ўша куни ‘Тунйироқ’ маҳалласига кетаётган эди. Йўлда у қишлоқ аҳолиси ва фермерлар билан бирга пахта тераётган болаларни кўриб қолади. Отамнинг болаларга ‘Сиз ота-онангизга ёрдам беришга чиқдингизми, қаерда ўқийсиз?’ деган саволига болалар мактабдан пахтага чиқарилганини айтган. Пахта даласида 15-мактаб маъмурияти вакиллари ҳам бўлган. Отам болалардан нечанчи синфда ўқишини сўраган. У ерда бешинчи, олтинчи ва юқори синф ўқувчилари ҳам бўлган.
Мактаб ўқувчиларининг пахта тераётгани акс этган суратлар кундузги соат 11—12 атрофида олинган.
Фермерлар отамдан ушбу суратларни ҳеч қаерга тарқатмасликни сўраган. Кейинроқ улар болаларнинг Когон тумани ҳокими Йўлдош Жумаев буйруғи ҳамда Когон тумани халқ таълими бошқармаси кўрсатмаси билан пахта даласига олиб чиқилганини тан олган.
Мавзуга доир: Ички ишлар вазирлиги ўз ходимларининг пахтага чиқмаслик бўйича норозилигига муносабат билдирди
Манбанинг хабар беришича, болалар пахта даласига дам олиш ва байрам кунлари олиб чиқилмоқда.
1 октябрь куни эса манбанинг ўзи бир неча фермер хўжаликларида 17 нафар бола пахта тераётганининг гувоҳи бўлган.
Нашр Бухоро вилояти, Когон тумани ҳокимлиги ҳамда 15-мактаб маъмурияти билан боғланишга уриниб кўрди. Бироқ ҳаракатлар бесамар кетган.
Изоҳ (0)