“O‘zbekiston temir yo‘llari” AJ tizimidagi “Temiryo‘lyonilg‘ita’mir” boshqarmasiga qarashli Buxoro birlashgan yonilg‘i-moy ombori brigadiri R.N. xo‘jalik haydovchisi R.H. bilan til biriktirib, yonilg‘i-moy o‘g‘irlayotganda qo‘lga olindi. Bu haqda “Daryo”ga huquq-tartibot organlaridagi manbasi ma’lum qildi.
Xabar berilishicha, “Temiryo‘lyonilg‘ita’mir” boshqarmasiga qarashli 80 912 YAA davlat raqam belgili “MAZ” rusumli maxsus yuk avtomashinasi haydovchisi R.H.ga 5000 litr dizel moyini “Uchquduq-22” yonilg‘i-moy omboriga yetkazish ishonib topshirilgan. Biroq u “Buxoro—Uchquduq” yo‘nalishida harakatlanib ketayotib, Romitan tumani hududiga yetganda belgilangan yo‘nalishdan chiqqan.
Ombor brigadiri rejasi asosan chorva mollarini boqishga mo‘ljallangan binoda oldindan tayyorlab qo‘yilgan maxsus idishlarga har bir litrini 3000 so‘mdan, jami 3000 litr dizel moyini to‘kayotgan haydovchi DXX Buxoro viloyati boshqarmasi, Bosh prokuratura huzuridagi iqtisodiy jinoyatlarga qarshi kurashish departamenti viloyat boshqarmasi hamda “O‘zneftgazinspeksiya” hududiy bo‘limi xodimlari tomonidan qo‘lga olingan.
Mazkur holat bo‘yicha to‘plangan protsessual hujjatlar viloyat prokuraturasi tomonidan o‘rganib chiqilgan va O‘zbekiston Respublikasi Jinoyat Kodeksining 167-moddasi bilan jinoyat ishi qo‘zg‘atilgan. Hozirda dastlabki tergov harakatlari olib borilmoqda.
Izoh (0)