«Ўзбекистон темир йўллари» АЖ тизимидаги «Темирйўлёнилғитаъмир» бошқармасига қарашли Бухоро бирлашган ёнилғи-мой омбори бригадири Р.Н. хўжалик ҳайдовчиси Р.Ҳ. билан тил бириктириб, ёнилғи-мой ўғирлаётганда қўлга олинди. Бу ҳақда «Дарё»га ҳуқуқ-тартибот органларидаги манбаси маълум қилди.
Хабар берилишича, «Темирйўлёнилғитаъмир» бошқармасига қарашли 80 912 YAA давлат рақам белгили «МАЗ» русумли махсус юк автомашинаси ҳайдовчиси Р.Ҳ.га 5000 литр дизель мойини «Учқудуқ-22» ёнилғи-мой омборига етказиш ишониб топширилган. Бироқ у «Бухоро—Учқудуқ» йўналишида ҳаракатланиб кетаётиб, Ромитан тумани ҳудудига етганда белгиланган йўналишдан чиққан.
Омбор бригадири режаси асосан чорва молларини боқишга мўлжалланган бинода олдиндан тайёрлаб қўйилган махсус идишларга ҳар бир литрини 3000 сўмдан, жами 3000 литр дизель мойини тўкаётган ҳайдовчи ДХХ Бухоро вилояти бошқармаси, Бош прокуратура ҳузуридаги иқтисодий жиноятларга қарши курашиш департаменти вилоят бошқармаси ҳамда «Ўзнефтгазинспекция» ҳудудий бўлими ходимлари томонидан қўлга олинган.
Мазкур ҳолат бўйича тўпланган процессуал ҳужжатлар вилоят прокуратураси томонидан ўрганиб чиқилган ва Ўзбекистон Республикаси Жиноят Кодексининг 167-моддаси билан жиноят иши қўзғатилган. Ҳозирда дастлабки тергов ҳаракатлари олиб борилмоқда.
Изоҳ (0)