Sog‘liqni saqlash vaziri kaltaklangan tez yordam shifokori holidan xabar olib, Bosh prokurorga murojaat qildi

Unda shifokorga bemorning qarindoshlari tomonidan haqoratlanib, jarohat yetkazilgani qayd etiladi.

Sog‘liqni saqlash vazirligi Jamoatchilik bilan aloqalar bo‘limining “Daryo”ga xabar berishicha, vazir Alisher Shodmonov ayni paytda 7-klinik shifoxonada davolanayotgan Jahongir Xo‘jayev holidan xabar oldi, uning sog‘lig‘i bilan qiziqdi.

Respublikaning yetakchi mutaxassislari bilan konsilium o‘tkazib, Jahongir Xo‘jayevning sog‘ayib ketishi uchun lozim bo‘lgan barcha chora-tadbirlarni ko‘rish yuzasidan topshiriqlar berdi.

Shu kunning o‘zida Jahongir Xo‘jayevga ixtisoslashtirilgan tibbiy yordam ko‘rsatish maqsadida poytaxtdagi 7-klinik shifoxonadan Respublika Shoshilinch tibbiy yordam ilmiy markaziga davolanish uchun ko‘chirildi.

“Vazir, shuningdek, o‘z huzur-halovatidan kechib, o‘zgalarga shifo baxsh etayotgan, insonlar dardiga darmon bo‘layotgan shifokorlarning haq-huquqlarini qat’iy himoya qilish uchun alohida huquqiy hujjat qabul qilish vaqti allaqachon kelganini, yelkasiga ulkan mas’uliyatni olib, inson salomatligi yo‘lida tunu-kun xizmat qilayotgan kasb egalariga nisbatan bo‘layotgan salbiy munosabatlarni o‘zgartirish zarurligiga e’tibor qaratdi.

Eng muhimi, har bir tibbiyot xodimi mehnat faoliyati, haq-huquqi vazirlik himoyasida ekanini ta’kidladi. Shuning uchun ham Sog‘liqni saqlash vaziri Alisher Shodmonov shifokorlarga tajovuz qilish kabi illatning oldini olishning eng samarali yo‘llaridan biri sifatida tibbiyot xodimiga nisbatan sodir etilayotgan har bir noqonuniy xatti-harakatlar uchun qat’iy javobgarlikni kuchaytirish barobarida uni nazoratga olish kerakligi bo‘yicha shu yilning 2-oktabrida O‘zbekiston Respublikasi Bosh prokuraturasiga murojaat qildi”, — deyiladi xabarda.

O‘z navbatida Jahongir Xo‘jayev tibbiyot xodimlari obro‘sini yuksaltirish yo‘lida hamisha o‘z xissasini qo‘shishini qat’iy bildirib o‘tdi, deyiladi xabarda.