DXX raisining sobiq o‘rinbosari 16 yilga, sobiq maslahatchisi 17 yilga qamaldi

O‘zbekiston Harbiy sudi tomonidan 27 sentyabr kuni Davlat xavfsizligi xizmati (DXX)ning sobiq raisi Ixtiyor Abdullayev va u tomonidan tashkil etilgan jinoiy uyushma a’zolariga nisbatan ayblov hukmi e’lon qilindi.

Oliy sud matbuot xizmatidan xabar berishlaricha, jinoyatlari aynan “Abdullayev ishi” doirasida ko‘rib chiqilgan DXX raisining sobiq o‘rinbosari Jahongir Egamov 16 yilga, DXX raisining sobiq maslahatchisi Alisher Eshonxo‘jayev esa 17 yilga ozodlikdan mahrum etilgan. Ular, shuningdek, muayyan muddatga mansabdorlik va moddiy javobgarlik bilan bog‘liq lavozimlarda ishlash huquqidan mahrum qilingan.

Avvalroq Yunusobod tumanining sobiq hokimi Baxtiyor Abdusamatov uning qo‘lga olinishi DXXning sobiq rahbarlari, xususan, Jahongir Egamov tomonidan uyushtirilganini taxmin qilgan edi. Abdusamatovning so‘zlariga ko‘ra, ommaviy axborot vositalarida hokimning pora olayotganda qo‘lga olingani to‘g‘risidagi xabarlar ushbu taxminning asosiy dalilidir.

“Kimdir yolg‘ondan shon-shuhratga ega bo‘lishni xohladi va bu ishni… Davlat xavfsizlik xizmati raisining birinchi o‘rinbosari Jahongir Egamov, boshqarmalarning sobiq rahbarlari amalga oshirdi”, — degandi Baxtiyor Abdusamatov o‘zining sudida.

Xabar to‘ldirilmoqda