Қашқадарё вилояти давлат ўрмон хўжалигининг «Қизилтом» ўрмон бўлими ҳудудларида ноёб тоғ арчалари кесилгани аниқланди, деб хабар бермоқда Давлат экология қўмитаси матбуот хизмати.
Қашқадарё вилояти Экология ва атроф-муҳитни муҳофаза қилиш бошқармаси инспекторлари 23 сентябрь, душанба куни «Қизилтом» ўрмон бўлими ҳудудларида ўрмон қоидабузарликларига қарши курашиш мақсадида назорат тадбири ўтказган. Унда Қашқадарё давлат ўрмон хўжалиги мутасаддиларининг ўз ишига эътиборсизлиги ҳамда масъулятсизлиги оқибатида қатор қонун бузилиш ҳолатлари содир этилганлиги аниқланган.
Хусусан, ўрмон ходими Бозор Шаймуродов билан биргаликда Қашқадарё давлат ўрмон хўжалиги «Қизилтом» ўрмон бўлими ҳудудлари кўздан кечирилганда жами 101 туп турли диаметрдаги зарафшон арча дарахтлари таг қисмидан кесиб тахлаб қўйилганлиги аниқланган. Шундан:- маҳаллий номи «Зардолисой» массивида 16,1—20 сантиметрлик 30 туп, 20,1—24 сантиметрлик 12 туп табиий ўсган зарафшон арча дарахтлари таг қисмидан кесилганлиги;
- маҳаллий номи «Алмардон» бўлган массивда 16,1—20 сантиметрлик 19 туп, 12 сантиметрлик 7 туп зарафшон арча дарахтлари таг қисмидан кесиб, тана қисмини арчиб, ёғоч қилиб тайёрлаб қўйилганлиги;
- маҳаллий номи «Шўрбулоқ» массивининг юқори қисмида 8,1—12 сантиметрлик 15 туп, 12,1—16 сантиметрлик 18 туп зарафшон арча дарахтлари таг қисмидан кесиб, ёғоч қилиб тайёрлаб қўйилганлиги ҳолатлари аниқланган ва бу ҳақда далолатнома расмийлаштирилган.
Вазирлар Маҳкамасининг 2014 йил 20 октябрдаги қарори билан тасдиқланган «Ўсимлик дунёси объектларидан фойдаланиш ва ўсимлик дунёси объектларидан фойдаланиш соҳасида рухсат бериш тартиб-таомилларидан ўтиш тартиби тўғрисидаги низом»нинг 14-иловасига асосан табиатга, ўсимлик дунёсига етказилган зарар миқдори 129 миллион 228 минг 500 сўмни ташкил қилди.
«Юқорида аниқланган ҳолатлар бўйича белгиланган тартибда чора кўриш учун тўпланган ҳужжатлар ҳуқуқни муҳофаза қилиш органларига тақдим қилиш учун расмийлаштирилмоқда», — дейилади хабарда.
Изоҳ (0)