O‘zbekiston Oliy Majlisi Qonunchilik palatasi va mahalliy kengashlarga 22-dekabrda bo‘lib o‘tadigan saylovlarni tashkil etishga jalb qilinadigan shaxslarga ish haqi to‘lanadi. Bu haqda Markaziy saylov komissiyasi (MSK) raisi Mirzo-Ulug‘bek Abdusalomov ma’lum qildi, deya xabar bermoqda “Daryo” muxbiri Musulmonbek Ibrohimov.
Abdusalomovning ta’kidlashicha, saylovni tashkillashtirishda qatnashgan, saylov okruglari va uchastkalarida ishlagan har bir odamning mehnati uchun haq to‘lanadi. “Buni qonun bilan ham belgilab qo‘ydik, hozir byudjetga ham kirityapmiz. Maqsad — majburiy mehnat bo‘lmasin. Odamlar mehnatiga yarasha haqini olsin, degan fikrdamiz”, — dedi MSK raisi.
O‘tgan saylovlarda maktablar hududida tashkil etilgan ba’zi saylov uchastkalarida a’zolarning bari (100 foizi) shu maktabning xodimlari — direktori va o‘rinbosarlari bo‘lib qolgan. MSK raisining ta’kidlashicha, 2019-yilgi saylovlarda bu amaliyotga ham chek qo‘yilishi kutilmoqda.
“Hozir qonunchilikka yangi norma kiritildi — saylov komissiyasi a’zolarining faqat 50 foizigacha bir tashkilot xodimlari bo‘lishi mumkin. Qolgan yarmi esa nodavlat-notijorat tashkilotlarning vakillaridan iborat bo‘ladi”, — dedi Mirzo-Ulug‘bek Abdusalomov.
Izoh (0)