Ўзбекистон Олий Мажлиси Қонунчилик палатаси ва маҳаллий кенгашларга 22 декабрда бўлиб ўтадиган сайловларни ташкил этишга жалб қилинадиган шахсларга иш ҳақи тўланади. Бу ҳақда Марказий сайлов комиссияси (МСК) раиси Мирзо-Улуғбек Абдусаломов маълум қилди, дея хабар бермоқда «Дарё» мухбири Мусулмонбек Иброҳимов.
Абдусаломовнинг таъкидлашича, сайловни ташкиллаштиришда қатнашган, сайлов округлари ва участкаларида ишлаган ҳар бир одамнинг меҳнати учун ҳақ тўланади. «Буни қонун билан ҳам белгилаб қўйдик, ҳозир бюджетга ҳам киритяпмиз. Мақсад — мажбурий меҳнат бўлмасин. Одамлар меҳнатига яраша ҳақини олсин, деган фикрдамиз», — деди МСК раиси.
Ўтган сайловларда мактаблар ҳудудида ташкил этилган баъзи сайлов участкаларида аъзоларнинг бари (100 фоизи) шу мактабнинг ходимлари — директори ва ўринбосарлари бўлиб қолган. МСК раисининг таъкидлашича, 2019 йилги сайловларда бу амалиётга ҳам чек қўйилиши кутилмоқда.
«Ҳозир қонунчиликка янги норма киритилди — сайлов комиссияси аъзоларининг фақат 50 фоизигача бир ташкилот ходимлари бўлиши мумкин. Қолган ярми эса нодавлат-нотижорат ташкилотларнинг вакилларидан иборат бўлади», — деди Мирзо-Улуғбек Абдусаломов.
Изоҳ (0)