Prezident Shavkat Mirziyoyev 25-sentabr kuni O‘zbekiston soliq siyosatini yanada takomillashtirish to‘g‘risidagi farmonni imzoladi, deya xabar bermoqda “Gazeta.uz” hukumatdagi manbasiga tayanib. Farmon bilan 1-oktabrdan boshlab qo‘shilgan qiymat solig‘i stavkasi 20 foizdan 15 foizga pasaytirilishi haqida avval xabar berilgan edi.
Hukumatga 2020-yilgi davlat byudjeti loyihasini tayyorlashda qo‘shilgan qiymat solig‘ini hisob-kitob qilish va to‘lashning soddalashtirilgan tartibini bekor qilish, shuningdek, dividend shaklida to‘lanadigan daromad solig‘i stavkalarinini saqlab qolgan holda yuridik shaxslarga solinadigan foyda solig‘ining bazaviy stavkasini 15 foiz miqdorida belgilashni (bungacha 12 foiz edi) nazarda tutish topshirilgan.
Bundan tashqari, 2020 yildan byudjet tashkilotlari va davlat korxonalari, ustav jamg‘armasi (kapitali)da davlat ulushi 50 foiz va undan ko‘proq miqdorda bo‘lgan yuridik shaxslar, ustav jamg‘armasi (kapitali)ning 50 foizi va undan ko‘proq miqdori davlat ulushi 50 foiz va undan ko‘proq bo‘lgan yuridik shaxsga tegishli yuridik shaxslar hamda ularning tarkibiy tuzilmalari uchun yagona ijtimoiy to‘lov stavkasini 25 foizdan 12 foizga tushirish ko‘zda tutilmoqda.
1-oktabrdan boshlab Moliya vazirligining byudjetdan tashqari Pensiya jamg‘armasiga o‘tkazib kelingan yagona soliq to‘lovi Qoraqalpog‘iston, viloyatlar va Toshkent shahar mahalliy byudjetlariga o‘tkazila boshlanadi. Shuningdek, davlat soliq xizmati organlari tomonidan soliq to‘lovchilarning tijorat banklaridagi hisobvaraqalari bo‘yicha operatsiyalarni to‘xtatib turishning amaldagi tartibi bekor qilinadi.
Prezident Shavkat Mirziyoyev 11-sentabr kuni bo‘lib o‘tgan videoselektorda Moliya vazirligiga QQS stavkasini kamaytirish bo‘yicha aniq asoslangan taklif kiritish haqida topshiriq bergan edi.
Keyinroq Davlat soliq qo‘mitasi videoselektorda Prezident tomonidan stavkani 20 foizdan 15 foizga pasaytirish haqida topshiriq bo‘lgani, bu holatda byudjet tushumlari yiliga taxminan 10 trillion so‘mga yoki YaIMga nisbatan 2 foizga kamayishi mumkinligini ma’lum qilgan edi.
Qayd etishlaricha, O‘zbekiston 2008-yilgi global inqirozdan so‘ng QQS stavkasini sezilarli pasaytirayotgan jahondagi ilk mamlakat bo‘lmoqda. Biznesmen Zafar Hoshimovning fikricha, stavkaning pasaytirilishi “yashirin iqtisodiyot sektorining qisqarishiga va byudjet yig‘imlarining sezilarli oshishiga olib keladi”.
Izoh (0)