O‘zbekistonda saylov jarayonlarini boshqarishning axborot tizimi va saylovchilarning Yagona elektron ro‘yxati joriy etilmoqda. Bu haqda Markaziy saylov komissiyasi raisi Mirzo-Ulug‘bek Abdusalomov ma’lum qildi, deya xabar bermoqda “Daryo” muxbiri Musulmonbek Ibrohimov.
22-dekabrda Oliy Majlis Qonunchilik palatasi va mahalliy kengashlarga saylovlar bo‘lib o‘tadi. 20-sentabrdan saylov kampaniyasiga start berilgan, 24-sentabr kuni esa saylovlarda qatnashadigan besh partiya — Tadbirkorlar va ishbilarmonlar harakati – Liberal-demokratik partiya, “Adolat” sotsial-demokratik partiyasi, “Milliy tiklanish” demokratik partiyasi, Xalq demokratik partiyasi hamda Ekologik partiyaning vakolatli vakillari ro‘yxatga olinib, ularga saylovchilarning imzolarini to‘plashlari uchun belgilangan namunadagi imzo varaqalari topshirilgan.
Mirzo-Ulug‘bek Elchiyevichning ta’kidlashicha, 2019-yilgi parlament saylovlari ilk bor “xalqaro normalar va standartlarga javob beradigan, ixcham”, 18 bob, 103 moddan iborat Saylov kodeksi asosida o‘tkaziladi. Bundan tashqari, milliy saylov tizimiga saylov jarayonlarini boshqarish axborot tizimi va saylovchilarning Yagona elektron ro‘yxati ham joriy etilmoqda.
“Ushbu tizim huquqiy tajriba sifatida 2017-yil dekabr oyida Toshkent shahrida xalq deputatlari tuman kengashlari saylovida sinovdan o‘tkazilgan edi. Ushbu tizimga saylovchilarning yashash joylari bo‘yicha ma’lumotlari kiritiladi va ‘bir saylovchi — bir ovoz’ tamoyili asosida ish yuritiladi. Bunda saylovchilarni turli joylarda bir necha marta ro‘yxatga kirib qolishlarini oldi olinadi. Bundan tashqari, butun oila nomidan bir kishining ovoz berib ketishidek eski “kasallik”ning ildizi qirqiladi”, — dedi MSK raisi.
Hozirda imkoniyati cheklangan fuqarolarning saylov uchastkalariga kelib-ketishi, erkin harakatlanishi uchun qulayliklar hozirlanmoqda. Ta’kidlanishicha, uchastkalarga Brayl alifbosida byulletenlar va tashviqot materiallari yetkaziladi. “Nomzodlar bilan uchrashuvlarda ham imkoniyati cheklangan fuqarolarning ishtirokini ta’minlash va faol ishtirok etishi uchun sharoit yaratishga harakat qilmoqdamiz”, — deya qo‘shimcha qildi Mirzo-Ulug‘bek Abdusalomov.
Ta’kidlanishicha, saylovlarda o‘z-o‘zini boshqarish organlarining vakillari ham xalq nazorati o‘laroq kuzatuvchi sifatida qatnashishiga ruxsat beriladi. Ma’lumot uchun, 2019-yilgi saylovlarda 20 milliondan ortiq saylovchi — shulardan 2 millondan ziyod yoshlar ilk bor — ovoz beradi. Saylovlarda 16 mingdan ziyod saylov okruglari va saylov uchastkalari tuzilishi rejalashtirilgan.
Izoh (0)