Umumta’lim maktablarida yoshlarni vatanparvarlik ruhida tarbiyalash bo‘yicha direktor o‘rinbosari lavozimi joriy etiladi. Bu haqda “Daryo”ga Markaziy harbiy okrug matbuot xizmati xabar berdi.
Ma’lum qilinishicha, O‘zbekiston Mudofaa vazirligi hamda Xalq ta’limi vazirligi tomonidan iste’fodagi faxriy harbiylarni tarbiyaviy jarayonga jalb qilish bo‘yicha chora-tadbirlar rejasi tasdiqlangan.
Unga ko‘ra, noyabr oyiga qadar umumta’lim muassasalaridagi chaqiruvga qadar tayyorgarlik rahbari lavozimi o‘rniga yoshlarni vatanparvarlik ruhida tarbiyalash bo‘yicha direktor o‘rinbosari lavozimi joriy etiladi.
Shu bilan birga umumta’lim maktablaridagi chaqiruvga qadar boshlang‘ich tayyorgarlik fanidan mashg‘ulot o‘tadigan mutaxassislar (direktor o‘rinbosari) tarkibini Qurolli Kuchlardan nafaqaga bo‘shatilgan, harbiy kiyim-bosh kiyib yurish huquqiga ega hamda harbiy sohada yuqori bilimga ega 60 yoshga to‘lmagan zaxiradagi ofitser va serjantlardan tayinlanadi.
Shuningdek, qo‘shma rejada direktor o‘rinbosarlarining malakasini oshirish tartibi, harbiy qismda hamda umumta’lim maktablarida harbiy vatanparvarlik tadbirlarini o‘tkazish bo‘yicha bir qator vazifalar belgilangan.
Izoh (0)