Президент Шавкат Мирзиёев 25 сентябрь куни Ўзбекистон солиқ сиёсатини янада такомиллаштириш тўғрисидаги фармонни имзолади, дея хабар бермоқда «Gazeta.uz» ҳукуматдаги манбасига таяниб. Фармон билан 1 октябрдан бошлаб қўшилган қиймат солиғи ставкаси 20 фоиздан 15 фоизга пасайтирилиши ҳақида аввал хабар берилган эди.
Ҳукуматга 2020 йилги давлат бюджети лойиҳасини тайёрлашда қўшилган қиймат солиғини ҳисоб-китоб қилиш ва тўлашнинг соддалаштирилган тартибини бекор қилиш, шунингдек, дивиденд шаклида тўланадиган даромад солиғи ставкаларинини сақлаб қолган ҳолда юридик шахсларга солинадиган фойда солиғининг базавий ставкасини 15 фоиз миқдорида белгилашни (бунгача 12 фоиз эди) назарда тутиш топширилган.
Бундан ташқари, 2020 йилдан бюджет ташкилотлари ва давлат корхоналари, устав жамғармаси (капитали)да давлат улуши 50 фоиз ва ундан кўпроқ миқдорда бўлган юридик шахслар, устав жамғармаси (капитали)нинг 50 фоизи ва ундан кўпроқ миқдори давлат улуши 50 фоиз ва ундан кўпроқ бўлган юридик шахсга тегишли юридик шахслар ҳамда уларнинг таркибий тузилмалари учун ягона ижтимоий тўлов ставкасини 25 фоиздан 12 фоизга тушириш кўзда тутилмоқда.
1 октябрдан бошлаб Молия вазирлигининг бюджетдан ташқари Пенсия жамғармасига ўтказиб келинган ягона солиқ тўлови Қорақалпоғистон, вилоятлар ва Тошкент шаҳар маҳаллий бюджетларига ўтказила бошланади. Шунингдек, давлат солиқ хизмати органлари томонидан солиқ тўловчиларнинг тижорат банкларидаги ҳисобварақалари бўйича операцияларни тўхтатиб туришнинг амалдаги тартиби бекор қилинади.
Президент Шавкат Мирзиёев 11 сентябрь куни бўлиб ўтган видеоселекторда Молия вазирлигига ҚҚС ставкасини камайтириш бўйича аниқ асосланган таклиф киритиш ҳақида топшириқ берган эди.
Кейинроқ Давлат солиқ қўмитаси видеоселекторда Президент томонидан ставкани 20 фоиздан 15 фоизга пасайтириш ҳақида топшириқ бўлгани, бу ҳолатда бюджет тушумлари йилига тахминан 10 триллион сўмга ёки ЯИМга нисбатан 2 фоизга камайиши мумкинлигини маълум қилган эди.
Қайд этишларича, Ўзбекистон 2008 йилги глобал инқироздан сўнг ҚҚС ставкасини сезиларли пасайтираётган жаҳондаги илк мамлакат бўлмоқда. Бизнесмен Зафар Ҳошимовнинг фикрича, ставканинг пасайтирилиши «яширин иқтисодиёт секторининг қисқаришига ва бюджет йиғимларининг сезиларли ошишига олиб келади».
Изоҳ (0)