Prezident Shavkat Mirziyoyev 25-sentabr kuni BMT Inson huquqlari kengashining sudyalar va advokatlar mustaqilligi masalalari bo‘yicha maxsus ma’ruzachisi Diyego Garsiya-Sayanni qabul qildi, deya xabar bermoqda davlat rahbarining matbuot xizmati.
Uchrashuvda hamkorlikning istiqbolli yo‘nalishlari yuzasidan batafsil fikr almashilgan, O‘zbekistonning sud-huquq sohasidagi qonunchiligini yanada takomillashtirish jihatlari va qo‘shma tadbirlar o‘tkazish masalalari muhokama qilingan.
“Diyego Garsiya-Sayan davlatimiz rahbari tashabbusi bilan davlat va xalq o‘rtasida bevosita muloqot orqali fuqarolik jamiyatini rivojlantirish, qonuniylik va huquq ustuvorligini mustahkamlash, odil sudlovni ta’minlash borasida amalga oshirilayotgan islohotlarni yuksak baholadi”, — deyiladi rasmiy axborotda.
U O‘zbekiston bilan konstruktiv hamkorlikni davom ettirishga va demokratik yangilanishlarni amalga oshirishda amaliy ko‘maklashishga tayyor ekanini ta’kidlagan.
Izoh (0)