O‘zbekistonda ilk bor o‘tkazilayotgan “Razvedka reydi” musobaqasiga start berildi

Jizzax viloyatida joylashgan “Forish” tog‘-dala o‘quv maydonida Mudofaa vazirligi qo‘shinlari razvedka bo‘linmalari o‘rtasidagi “Razvedka reydi” musobaqasining tantanali ochilish marosimi bo‘lib o‘tdi. Bu haqda Mudofaa vazirligi axborot va ommaviy kommunikatsiyalar departamenti “Daryo”ga ma’lum qildi.

Musobaqa okrug hamda oliy harbiy ta’lim muassasalaridan jami 11 ta jamoa ishtirok etmoqda.

Mazkur musobaqa uch bosqichda o‘tkazildi. Dastlab harbiy qism, so‘ngra okrug miqyosida g‘olib bo‘lgan jamoalar yakuniy bosqichda ishtirok etish imkoniyatini qo‘lga kiritdi. Yakuniy bosqichda esa ular 10 ta shart bo‘yicha o‘zaro bellashadi.

Shu kuni jamoalar ilk shartlarni bajarishga kirishdi. Dastlab harbiy xizmatchilar 7,5 kilometrlik masofaga og‘irligi 35 kilogrammga yaqin bo‘lgan yuk qopi bilan marsh yurdi. Mashg‘ulot shartiga ko‘ra, har bir jamoa yuqori qo‘mondonlikdan berilgan maxsus vazifalarga asosan shartli dushman joylashgan hududni aniqlash va qaror ishlab chiqish vazifalarini bajardi.

Shuningdek, marsh yurish davomida minalashtirilgan yo‘laklardan betalafot o‘tish, jangda yaralangan harbiy xizmatchiga birinchi tez tibbiy yordam ko‘rsatish va uni bir yarim kilometr masofaga evakuatsiya qilish sinovlaridan o‘tdi.

Shundan so‘ng uch kilometr uzoqlikdagi joylashuv hududiga yetib borish, u yerda qo‘riqlov o‘rnatish va guruh shaxsiy tarkibiga vaqtinchalik yashash joyini hozirlash, dala sharoitidan kelib chiqqan holda zarur sharoitlar yaratish singari shartlarni bajardi.

Jamoalarning har bir harakati Mudofaa vazirligi mas’ul ofitserlaridan tayinlangan hakamlar hay’ati tomonidan xolisona baholab borildi. Oldinda hali ishtirokchilar belgilangan hududda razvedka ishlarini olib borish, shartli dushmanning obyektini yakson qilish, suvli to‘siqlardan o‘tish, azimut bo‘yicha o‘n kilometr masofaga harakatlanish, 3 kilometr masofaga yugurish, kimyoviy zararlangan hududlardan himoyalanish, ruhiy yo‘laklar to‘sig‘idan o‘tish va mutaxassislik bo‘yicha qator me’yorlarni bajaradi.

Eslatib o‘tamiz, musobaqa 28-sentabrgacha davom etadi.