“Yandeks.Xaritalar” Toshkentdagi avtobuslar harakatini ko‘rsata boshladi

“Yandeks.Xaritalar” ilovasida Toshkentdagi shahar avtobuslarining harakatlanishini ko‘rsatishni boshladi. Bu haqda “Yandeks” matbuot xizmati “Daryo”ga xabar berdi.

“Endi kerakli transport qayerda kelayotgani va qancha vaqtda manzilga kelishini oldindan bilish mumkin. Masalan, yomon ob-havoda avtobus kelishini kutmasdan, uning kelish vaqtiga bekatga chiqish mumkin”, — deyiladi kompaniya xabarida.

Avtobuslar harakatini kuzatish uchun, “Yandeks.Xaritalar”ning veb-varianti va mobil ilovalardagi transportni ko‘rsatish rejimini yoqish lozim.

Ilovaning Android’dagi so‘nggi versiyasi o‘zbek tilida ham ishlaydi va uni shu tilda boshqarish mumkin. Tez orada ushbu imkoniyat iOS’dagi qurilmalarda ham ishga tushadi.

Bizga O‘zbekiston aholisining “Yandeks.Xaritalar”dan unumli foydalana olishi juda muhim. Shu sababli ham servis o‘zbek tiliga o‘tkazildi va harakatdagi transportlarni ko‘rish imkoniyati qo‘shildi. Avtobuslar qayerda ketayotganini aniq ko‘rsatishda bizga shahar hokimligi hamda ‘Toshshahartransxizmat’ yaqindan yordam bermoqda.

Yevgeniy Lukyanchikov, “Yandeks”ning O‘zbekistondagi hududiy direktori

Xaritada real vaqt rejimida avtobus qayerda ketayotganini ko‘rish, bekat satriga bosilganida esa uning necha daqiqada kelishini bilish mumkin. Ma’lumotlar har 30 soniyada yangilanib turadi.

“Bekat”ga bosilgan vaqtda “Yandeks.Xaritalar” ushbu manzildan o‘tadigan barcha avtobuslar raqamlarini ko‘rsatadi. Ilova yordamida kerakli nuqtaga olib boradigan yo‘lni ham belgilash mumkin.

Toshkent “Yandeks.Xaritalar” real vaqtda transportlar harakatlanishini ko‘rsatuvchi O‘zbekistondagi birinchi shahar bo‘ldi. Butun dunyoda bu kabi shaharlar soni 90 ta, ular orasida Rossiya, Belarus, Qozog‘iston, Yevropa va Amerika shaharlari mavjud.