«Яндекс.Хариталар» иловасида Тошкентдаги шаҳар автобусларининг ҳаракатланишини кўрсатишни бошлади. Бу ҳақда «Яндекс» матбуот хизмати «Дарё»га хабар берди.
«Энди керакли транспорт қаерда келаётгани ва қанча вақтда манзилга келишини олдиндан билиш мумкин. Масалан, ёмон об-ҳавода автобус келишини кутмасдан, унинг келиш вақтига бекатга чиқиш мумкин», — дейилади компания хабарида.
Автобуслар ҳаракатини кузатиш учун, «Яндекс.Хариталар»нинг веб-варианти ва мобил иловалардаги транспортни кўрсатиш режимини ёқиш лозим.
Илованинг Android’даги сўнгги версияси ўзбек тилида ҳам ишлайди ва уни шу тилда бошқариш мумкин. Тез орада ушбу имконият iOS’даги қурилмаларда ҳам ишга тушади.
Бизга Ўзбекистон аҳолисининг «Яндекс.Хариталар»дан унумли фойдалана олиши жуда муҳим. Шу сабабли ҳам сервис ўзбек тилига ўтказилди ва ҳаракатдаги транспортларни кўриш имконияти қўшилди. Автобуслар қаерда кетаётганини аниқ кўрсатишда бизга шаҳар ҳокимлиги ҳамда ‘Тошшаҳартрансхизмат’ яқиндан ёрдам бермоқда.Ҳозирда «Яндекс» Тошкентдаги давлат автобуслари ҳаракатини кўрсатмоқда. Иловада улар махсус белгилар билан қайд этилган.Евгений Лукянчиков, «Яндекс»нинг Ўзбекистондаги ҳудудий директори
Харитада реал вақт режимида автобус қаерда кетаётганини кўриш, бекат сатрига босилганида эса унинг неча дақиқада келишини билиш мумкин. Маълумотлар ҳар 30 сонияда янгиланиб туради.
«Бекат»га босилган вақтда «Яндекс.Хариталар» ушбу манзилдан ўтадиган барча автобуслар рақамларини кўрсатади. Илова ёрдамида керакли нуқтага олиб борадиган йўлни ҳам белгилаш мумкин.
Тошкент «Яндекс.Хариталар» реал вақтда транспортлар ҳаракатланишини кўрсатувчи Ўзбекистондаги биринчи шаҳар бўлди. Бутун дунёда бу каби шаҳарлар сони 90 та, улар орасида Россия, Беларусь, Қозоғистон, Европа ва Америка шаҳарлари мавжуд.
Изоҳ (0)