Janubiy koreyalik mutaxassislar Toshkent yaqinidagi tog‘li hududlarda yangi meteoqurilmalar o‘rnatdi. Bu haqda “O‘zgidromet” matbuot xizmati ma’lum qildi.
Koreyaning WeatherRia konsalting kompaniyasi hamda KEITI ekologik industrial va texnologik instituti vakillari Toshkentga keldi. Safar “O‘zbekistonda suv resurslari ta’minoti uchun qor qoplami sathini o‘lchashning ko‘p nuqtali lazerli skanerlash usulini ishlab chiqish” loyihasini amalga oshirish doirasida tashkil qilindi.
WeatherRia Koreya meteorologik ma’muriyati litsenziyasiga ega yagona kompaniya bo‘lib, mamlakat gidrometeorologik xizmatini modernizatsiyalash va takomillashtirishda faol ishtirok etadi. Kompaniya dunyoda birinchi bo‘lib qor qoplami sathini ko‘p nuqtali avtomatik lazerli o‘lchagichini ishlab chiqqan. “O‘zgidromet” 2018-yildan beri bu ikki tashkilot bilan hamkorlikda kuzatuv tizimlarini modernizatsiyalash loyihasini amalga oshirib kelmoqda.
Koreyalik mutaxassislarning O‘zbekistonga safari davomida Qamchiq qor ko‘chki stansiyasiga ko‘rinuvchanlikni belgilaydigan, Chorvoq va So‘qoq mintaqaviy uchastkalariga esa qor qatlamini o‘lchash uchun ko‘p nuqtali avtomatik lazerli o‘lchagich o‘rnatildi. “O‘zgidromet” texnik mutaxassislari uchun yangi o‘rnatilgan qurilmalarda ishlash bo‘yicha mashg‘ulot o‘tkazildi.
Izoh (0)