Qozog‘iston janubidagi Turkiston viloyatida yashovchi etnik o‘zbeklarga mamlakat shimoliga ko‘chib o‘tish taklif qilindi. Hukmron Nur Otan partiyasi viloyat bo‘limi raisining birinchi o‘rinbosari Baysen Tojiboyev boshchiligidagi axborot-targ‘ibot guruhi Sayram tumanidagi Qorabuloq qishlog‘i aholisi bilan uchrashgan. Bu haqda viloyat bo‘limining Facebook’dagi sahifasida ma’lum qilingan.
Hukmron Nur Otan partiyasi viloyat bo‘limi raisining birinchi o‘rinbosari Baysen Tojiboyev boshchiligidagi axborot-targ‘ibot guruhi Sayram tumanidagi Qorabuloq qishlog‘i aholisi bilan uchrashgan. Uchrashuv chog‘ida Tojiboyev bu yerda yashayotgan o‘zbeklarga “Yenbek” (“Mehnat”) dasturida faol ishtirok etish va uning afzalliklaridan foydalanishga chaqirgan.
— Qorabuloq mamlakatdagi aholisi eng ko‘p qishloq bo‘lib, bu yerda 60 mingdan ortiq kishi istiqomat qiladi. Bu yil shimolga bu yerdan atigi bitta oila ko‘chib o‘tgan. Dasturda ko‘chib o‘tganlarga qishloq xo‘jaligi ekinlari yetishtirish va chorvachilik uchun yer ajratilishi ko‘zda tutilgan. Mintaqamizda 400 ming nafardan ortiq mehnatkash o‘zbek istiqomat qiladi. Ular davlat dasturida faol ishtirok etsa, aholi ish va uy-joy bilan ta’minlangan bo‘ladi, shimoliy hududlar esa gullab-yashnaydi, — deya ta’kidlagan Nur Otan mansabdori.
Partiya viloyat bo‘limi tarqatgan press-relizda mazkur uchrashuv “muhim strategik ahamiyatga ega bo‘lgani” va o‘zbek jamoasi orasida ilk bor o‘tkazilgani qayd etilgan. Muloqot yakunida 52 ta oila shimoliy viloyatlarga ko‘chib o‘tish istagini bildirgan.
Shuningdek, mazkur xabarnomada “Yenbek” dasturi doirasida Turkiston viloyatidan shimoliy mintaqalarga oxirgi 4 yil mobaynida 881 oila yoki 3 377 kishi ko‘chib o‘tgani ma’lum qilingan.Baysen Tojiboyev mas’ul rahbarlarga aholisining umumiy soni 210 ming kishidan oshadigan Sayram tumanida dasturni keng targ‘ib qilishni topshirgan.
Qozog‘istonda janub va shimoldagi aholi soni bir-biriga qarama-qarshi tarzda o‘zgarib boradi. Jumladan, Kustanay (aholi soni 870 ming), Pavlodar (753 ming) va Shimoliy Qozog‘iston viloyatlarida (551 ming) yil boshidan beri aholi tegishli ravishda 2120, 808 va 2688 kishiga kamaygan bo‘lsa, Turkiston viloyatida bu vaqtda 15 167 kishiga ko‘payib, salkam 2 million kishiga yetgan.
Ma’lumot uchun, “Yenbek” davlat dasturi Qozog‘istonning birinchi prezidenti Nursulton Nazarboyev tashabbusi bilan 2015-yildan beri amalga oshirib kelinmoqda. Joriy yil birinchi yarmi davomida 280,8 ming kishi ushbu dastur ishtirokchisiga aylangan.
Izoh (0)