Google Fransiyaga salkam 1 mlrd yevro jarima to‘laydigan bo‘ldi

Google Fransiyada soliq to‘lashdan bo‘yin tovlash bo‘yicha to‘rt yillik tergovni hal qilishga kelishib oldi, deb xabar berdi “Kommersant”.

Fransiya prokuraturasi bilan kelishuv shartlariga ko‘ra, Google 500 million yevro miqdorida jarima va yana 465 million yevro qo‘shimcha soliq to‘laydi. Shu orqali jami mablag‘ salkam 1 milliard yevroni tashkil etadi.

“Mazkur bitim oldingi kelishmovchiliklarni birdaniga hal etadi”, — deydi advokat Antonen Levi Parij sudida.

“Biz uzoq yillar davomida Fransiyada olib borilgan soliq va unga bog‘liq mojarolarning barchasini hal qildik”, — deya ta’kidlagan kompaniya.

Eslatib o‘tamiz, fransuz prokuraturasi Google’ni 2015-yilda soliqlarni to‘lamaslikda gumonlab, kompaniya Fransiyadagi faoliyati davomida olayotgan daromadlari haqida to‘liq ma’lumot bermayotganini ta’kidlab kelayotgan edi.