O‘zbekiston Fermer, dehqon xo‘jaliklari va tomorqa yer egalari kengashi raisi Aktam Hayitov mamlakatda go‘sht narxining oshishiga ovqatlanish madaniyati ham ta’sir ko‘rsatayotgani haqida fikr bildirdi.
Hayitovning fikricha, go‘sht narxining oshishiga birinchi sabab — oziqa (zaxirasi) yetishmasligi. Ikkinchisi esa — aholi juda ko‘p go‘sht iste’mol qilmoqda.
“Go‘sht narxi nega qimmatlab ketyapti deb o‘ylaysizlar? To‘g‘ri, oziqa yetishmasligi birinchi sabab, ikkinchidan, bugun biz juda ko‘p go‘sht iste’mol qilyapmiz. Shunchalik ko‘p go‘sht yemoqdamizki, buning natijasida ko‘pgina kasalliklar paydo bo‘lyapti. Buni ‘Amerika kasalligi’ deyishadi, bu kasallik menda ham bor, hammamizning tanamizda ortiqcha go‘sht bor. Men faqat go‘shtni aytmayapman, ovqatlanish madaniyatimiz yo‘q”, — deya Hayitovning so‘zlaridan iqtibos keltirmoqda “Kun.uz”.
“To‘g‘ri.uz”ning qo‘shimcha qilishicha, Hayitov aholi “go‘shtni ham isrof qilishni boshlagani” haqida ham gapirib, talab va taklif bo‘lgan joyda narx-navo o‘ynashini eslatib o‘tgan.
“Narxni bozorning o‘zi boshqarmoqda. Go‘sht narxining oshishi bozorning ‘oltin qoidasi’ — talab va taklif bo‘lgan joyda narx-navo o‘ynaydi. Nega go‘sht yetishtiruvchining oyligi ko‘tarilmasin? Nimaga uning daromadi oshmasin? Biz go‘sht narxini ikki barobar oshirish niyatimiz yo‘q”, — deb Hayitovning so‘zlaridan iqtibos keltirmoqda internet-nashr.
O‘zbekiston Davlat statistika qo‘mitasidan ma’lum qilishlaricha, 2000-yillar boshida O‘zbekiston aholi yiliga o‘rtacha 34 kilogramm go‘sht va go‘sht mahsulotlari iste’mol qilgan bo‘lsa, 2005-yilda bu ko‘rsatkich 35,2 kilogrammga, 2010-yilda 38 kilogrammga, 2016-yilda esa 44,4 kilogrammgacha ko‘paygan.
Ma’lumotlarga ko‘ra, O‘zbekiston aholisi, Markaziy Osiyoning Qozog‘istondan boshqa mamlakatlarida bo‘lgani kabi, kuniga o‘rtacha 40—165 gramm atrofida go‘sht iste’mol qiladi. Bu jahonning rivojlangan mamlakatlaridagi ko‘rsatkich (kuniga o‘rtacha 165 grammdan ko‘p)dan past, lekin Afg‘oniston va aksariyat Afrika mamlakatlari bilan taqqoslaganda — ko‘p.
Izoh (0)