Наманган шаҳар ҳокимлигининг расмий нашри ҳисобланган «Наманган садоси» газетаси таъсис этилганига бу йил чорак аср тўлди. Бу ҳақда «Дарё»га ҳокимлик матбуот хизмати маълум қилди.
Жорий йил бошқа нашрлар қатори мазкур газета учун ҳам машаққатли йил бўлди. Иккинчи ярим йиллик учун обуна қониқарсиз кечди, таҳририят ҳисоб рақамига ҳаминқадар пул тушди. Почта ва «Матбуот тарқатувчи»даги аввалги обуна пулларини ундириш эса амримаҳол бўлиб қолди. Ўз-ўзидан, ходимлар иш ҳақини тўлаш ҳам муаммога айланди.
— Хуллас, газетамиз жар ёқасида эди. Шаҳар ҳокими Шавкатжон Абдураззоқовнинг олдига кириб, муаммоларни тушунтирдик. У киши бизни қўллаб-қувватлашини билдириб, ҳокимлик муассислигидаги газета учун маҳаллий бюджетдан пул ўтказилишини айтди. Орадан ҳеч қанча вақт ўтмади, ваъда бажарилди. Август ойи охирида шаҳар молия бўлими орқали ғазнадан таҳририят ҳисоб рақамига 80 миллион сўм келиб тушди. Дарров газетанинг байрам сонини тайёрлашга киришдик ва чоп этдик, — дейди газета масъул ходими Орифжон Жўраев.
Ўтказилган сумма йилнинг қолган 4 ойи учун босмахона, солиқ, иш ҳақи ва бошқа асосий харажатларга сарфланади. Юқоридаги каби муаммолар такрорланмаслиги учун таҳририят ҳозирданоқ келгуси йил обунаси ҳозирлигини бошлаган.
Маълумот учун, мустақилликнинг 28 йиллиги муносабати билан Президент фармонига мувофиқ Наманган шаҳар ҳокими Шавкатжон Абдураззоқов «Содиқ хизматлари учун» медалига муносиб кўрилди.
Изоҳ (0)