Sharqshunoslik institutining katta ilmiy xodimi, tarix fanlari bo‘yicha falsafa doktori Komiljon Rahimov bir oydan ortiq vaqt davomida Buxoro viloyatida xizmat safarida bo‘ldi.
Olim tomonidan olib borilgan ilmiy izlanishlar jarayonida Buxoro davlat universiteti axborot-resurs markazi va ilmiy-amaliy muzey laboratoriyasidagi qo‘lyozma va toshbosma asarlari ro‘yxati hamda qisqacha tavsifnomasi tuzib chiqildi, ularning tasnifi amalga oshirildi.
Eng muhim topilma — bugungi kunda BuxDU qo‘lyozma va toshbosma kitoblar fondida BDU-T №1 raqami bilan qayd etilgan, o‘z vaqtida Sankt-Peterburgdagi Imperator kutubxonasida saqlangan, keyinchalik O‘zbekistonga qaytarilgan Usmon Mus’hafidan (644–656) olingan nusxa ilk bor mukammal tadqiq qilindi.
Sharif kitobning “Yosin” surasi kufiy xatida yozilgan bo‘lib, o‘lchami 40x37 santimetrni tashkil etadi. Mazkur toshbosma kitobning 22 betdan 20 beti saqlangan.
Qur’onning qalbi hisoblangan “Yosin” surasi 1905-yilda Sankt-Peterburgda ma’rifatparvar olim Ilyos ibn Ahmadshoh tomonidan 50 nusxada faksimile nashri amalga oshirilgan.
Shu faksimile nashrning bir nusxasi BuxDU qo‘lyozma va toshbosma kitoblar fondida saqlab kelinmoqda. Universitet kutubxonasi va muzeylarida bunday noyob qo‘lyozma va toshbosma kitoblarning mavjudligi oliygoh nufuzini yanada oshiradi.
Izoh (0)