Андижон вилоятининг Қўрғонтепа туманида байрам арафасида 4 та давлат, 3 та хусусий-шерикчилик ва 14 та оилавий, жами 21 та замонавий мактабгача таълим муассасаси фойдаланишга топширилди. Бу ҳақда «Дарё»га туман мактабгача таълим бўлими мудираси Рўзихон Усмонохунова маълум қилди.
Унинг айтишича, шу билан тумандаги боғчаларнинг умумий сони 91 тага етган. Натижада 3 ёшдан 7 ёшгача бўлган 16 минг 620 нафар боладан 8 минг 960 нафарини қамраб олишга эришилган.
«Обод қишлоқ» ҳамда Инвестиция давлат дастурлари доирасида жорий йилда тумандаги 4 та МТМ қайта таъмирланган. Жумладан, 150 болани ўз бағрига оладиган 37-давлат мактабгача таълим муассасаси инвестиция дастури доирасида таъмирланиб, фойдаланишга топширилган.
Таъмирлангунга қадар боғчада 80 нафар бола тарбияланган бўлса, капитал таъмирлашдан сўнг 150 нафар бола қабул қилинади.
Мактабгача таълим муассасасида тарбияланувчилар учун замонавий ошхона, спорт, ҳарбий-ватанпарварлик, йўл ҳаракати қоидалари майдончаси, ота-оналар ва болалар кутубхонаси, ёзги айвончалар ҳамда саҳна майдончаси қурилди. МТМ замонавий юмшоқ мебель ҳамда ўйинчоқлар билан тўлиқ таъминланди.
Хавфсизликни таъминлаш мақсадида барча хоналар замонавий рақамли видеокузатув ҳамда қайд этиш камералари билан жиҳозланган. Бунинг учун 2 миллиард 600 миллион сўм сарфланган.
— Муассасамизнинг эски ҳолатини кўрсангиз нафақат болалар, балки биз тарбиячиларга ҳам раҳмингиз келиши аниқ эди, — дейди муассаса тарбиячиси Мадинахон Ҳакимова. — Бино икки қаватли бўлса-да, фақат биринчи қаватидан фойдаланардик. Шунда ҳам нураб кетган, зах хоналарда ишлашга мажбур бўлганмиз. Қурилиш ишлари якунланганида боғчамизни ўзимиз танимай қолдик.
Эслатиб ўтамиз, аввалроқ Фарғона вилоятида 10 мингдан ортиқ болани қамраб олиш қувватига эга 320 та нодавлат мактабгача таълим муассасаси фойдаланишга топширилгани ҳақида хабар берилганди.
Изоҳ (0)