Samarqand viloyatining Paxtachi tumanida avtomobil saqlash uchun mo‘ljallangan garajda noqonuniy dorixona tashkil etgan ayol javobgarlikka tortildi. Bu haqda Paxtachi tumani ma’muriy sudi raisi Umid Habibov “Daryo”ga ma’lum qildi.
Tumanning “Saroy” mahallasida yashovchi H.P. xonadoni avtogarajida norasmiy ravishda dorixona tashkil etgan. U 20-iyun kuni “xaridor”ga 20 ming so‘mlik dori sotgan vaqtida Iqtisodiy jinoyatlarga qarshi kurashish departamentining Paxtachi tumani bo‘limi xodimlari tomonidan ushlangan.
Xolislar ishtirokida o‘tkazilgan tekshirish chog‘ida garajdagi “dorixona”dan 243 turdagi 7 million 868 ming 702 so‘mlik dori-darmon vositalari olingan. Sudda huquqbuzar H.P. bunday faoliyat bilan noqonuniy shug‘ullanganini tan olgan va pushaymonligini aytib, suddan yengillik so‘ragan.
Sud H.P.ni Ma’muriy javobgarlik to‘g‘risidagi kodeksning 165-moddasi 1-qismi (faoliyat bilan litsenziyasiz va boshqa ruxsat beruvchi hujjatlarsiz shug‘ullanish) va 165-1-moddasida (dori vositalarini dorixonalardan va ularning filiallaridan tashqarida realizatsiya qilish) nazarda tutilgan ma’muriy huquqbuzarliklarni sodir etgan deb topgan va unga uzil-kesil eng kam oylik ish haqining ellik baravari — 10 million 136 ming 500 so‘m miqdorida jarima jazosini tayinlagan.
Daliliy ashyo sifatida olingan va tuman markaziy dorixonasida saqlanayotgan 7 million 868 ming 702 so‘mlik dori-darmon vositalari sud qarori bilan tegishli tartibda yo‘q qilingan.
Izoh (0)