Самарқанд вилоятининг Пахтачи туманида автомобиль сақлаш учун мўлжалланган гаражда ноқонуний дорихона ташкил этган аёл жавобгарликка тортилди. Бу ҳақда Пахтачи тумани маъмурий суди раиси Умид Ҳабибов «Дарё»га маълум қилди.
Туманнинг «Сарой» маҳалласида яшовчи Ҳ.П. хонадони автогаражида норасмий равишда дорихона ташкил этган. У 20 июнь куни «харидор»га 20 минг сўмлик дори сотган вақтида Иқтисодий жиноятларга қарши курашиш департаментининг Пахтачи тумани бўлими ходимлари томонидан ушланган.
Холислар иштирокида ўтказилган текшириш чоғида гараждаги «дорихона»дан 243 турдаги 7 миллион 868 минг 702 сўмлик дори-дармон воситалари олинган. Судда ҳуқуқбузар Ҳ.П. бундай фаолият билан ноқонуний шуғулланганини тан олган ва пушаймонлигини айтиб, суддан енгиллик сўраган.
Суд Ҳ.П.ни Маъмурий жавобгарлик тўғрисидаги кодекснинг 165-моддаси 1-қисми (фаолият билан лицензиясиз ва бошқа рухсат берувчи ҳужжатларсиз шуғулланиш) ва 165-1-моддасида (дори воситаларини дорихоналардан ва уларнинг филиалларидан ташқарида реализация қилиш) назарда тутилган маъмурий ҳуқуқбузарликларни содир этган деб топган ва унга узил-кесил энг кам ойлик иш ҳақининг эллик баравари — 10 миллион 136 минг 500 сўм миқдорида жарима жазосини тайинлаган.
Далилий ашё сифатида олинган ва туман марказий дорихонасида сақланаётган 7 миллион 868 минг 702 сўмлик дори-дармон воситалари суд қарори билан тегишли тартибда йўқ қилинган.
Изоҳ (0)