Prezident Shavkat Mirziyoyev 30-avgust kuni Toshkent shahridagi “Navro‘z” bog‘iga tashrif buyurdi. Prezident matbuot xizmatining yodga solishicha, ushbu loyiha bo‘yicha 2017-yil 7-avgustda Prezident qarori qabul qilingan, unga muvofiq “Navro‘z bog‘i” kompaniyasi tuzilib, zarur moliyaviy va tashkiliy ishlar belgilangan edi.
Shavkat Mirziyoyev 2018-yili fevralda bu yerga kelib, bog‘ning mazmun-mohiyatini boyitish bo‘yicha tavsiyalar bergandi. “Shu asosda bunyod etilgan ushbu dam olish maskanida xalqimiz madaniyati, milliy qadriyatlari chuqur ifodasini topgan. 2,5 gektar maydon etnografik shaharchaga aylantirilgan. Qoraqalpog‘iston va barcha viloyatlar nomlari bilan ataladigan ko‘chalar va qadimiy uslubda uylar bunyod etilib, har bir hududning o‘ziga xos an’analari, hunarmandchiligi, turmush tarzi aks ettirilgan”, — deya xabar bermoqda Prezident matbuot xizmati.
Paxsa devorli hovlilar, ayvonlar, choyxona va ustaxonalar timsolida qadimiy mahallalar qayta tiklangan. Qayd etishlaricha, bu yoshlarning xalq tarixi va milliy madaniyati haqidagi bilimlarini boyitib, vatanparvarlik tuyg‘ularini kuchaytiradi, xorijlik sayyohlar uchun diqqatga sazovor maskan bo‘ladi. “O‘zlikni anglash nuqtai nazaridan bu joyning ahamiyati katta. Bu yerda milliy qadriyatlarimiz, tariximiz yaqqol ko‘rinadi. O‘z tarixini chuqur bilgan xalq g‘ururli, qudratli, badavlat bo‘ladi”, — dedi Shavkat Mirziyoyev.
Prezident bu bog‘ faqat Navro‘z kunlari emas, yil davomida gavjum bo‘lishi, bu yerga kelganlar madaniy hordiq bilan birga ma’naviy oziqa ham olishi kerakligini ta’kidladi. Ta’kidlash joiz, ushbu o‘ziga xos shaharcha markazida Navro‘z bayrami tantanalarini o‘tkazishga mo‘ljallangan amfiteatr barpo etilgan. Bog‘ oxiridagi anhor ustida 88 metrlik ko‘prik qurilgan.
Izoh (0)