Prezident Shavkat Mirziyoyev 30-avgust kuni Toshkent shahrida amalga oshirilgan bunyodkorlik ishlarini ko‘zdan kechirdi. Prezident matbuot xizmatining xabar berishicha, Shavkat Mirziyoyev dastlab Toshkent davlat milliy raqs va xoreografiya oliy maktabi binosini borib ko‘rgan.
Mazkur dargoh ixtisoslashgan maktab-internat, xoreografiya kolleji, bakalavriat va magistratura yo‘nalishlarini qamrab olgan bo‘lib, xoreografiya bo‘yicha uzluksiz saboq beradi. “Lekin muassasa uzoq yillar eski binoda faoliyat yuritib keldi”, — deyiladi rasmiy axborotda.
Prezidentning 2017-yil 3-avgust kuni ijodkorlar bilan uchrashuvidan so‘ng Oliy maktab uchun alohida korpus ajratilib, zamonaviy ta’mirlandi. 15 milliard so‘mdan ziyod mablag‘ evaziga 400 talabaga mo‘ljallangan yangi o‘quv va mashg‘ulot xonalari, 300 o‘rinli talabalar turar joyida sharoit yaratildi.
Shavkat Mirziyoyev bu yerdagi sharoit, muhit va yutuqlarni O‘zbekistonning boshqa joylarida ham tatbiq etish, hududiy maktablar tashkil etib, ularni Oliy maktabga biriktirish, ustoz-shogird an’anasini mustahkamlash zarurligini ta’kidladi.
Prezident bilim yurtining o‘qituvchi va murabbiylari bilan suhbatlashdi. O‘zbek milliy san’atiga e’tibor, bu sohada yangi ta’lim maskanlari qurish va ustozlar mehnatini rag‘batlantirish ishlarini izchil davom ettirish lozimligi qayd etildi. “Bahor” raqs ansamblining qayta tiklanishi soha vakillariga katta quvonch bag‘ishladi.
Oliy maktab ijodkorlari uchun dam olish maskani tashkil etish va avtobus ajratish bo‘yicha topshiriq berildi.
Izoh (0)