Joriy yilning iyun oyida Xorazm viloyati hokimligi tomonidan viloyat IIB Xavfsiz turizmni ta’minlash boshqarmasiga xizmatda foydalanish uchun 10 ta skuter va 3 ta Nexia rusumli yengil avtomashina topshirildi. Bu haqda Xorazm viloyati turizmni rivojlantirish departamenti matbuot xizmati ma’lum qiladi.
Mazkur texnika vositalari xodimlarning xizmat olib borishlari jarayonida uzoq masofalarga tezkorlik bilan yetib borishida va viloyatga tashrif buyurayotgan sayyohlarning muammolarini ijobiy hal qilishda katta imkoniyatlar yaratadi.
Bundan tashqari, Xorazm viloyatining Xiva shahrida joylashgan “Ichan qal’a” davlat muzey-qo‘riqxonasiga doimiy ravishda ko‘plab turistlar tashrif buyurayotganligini inobatga olgan holda, “Ichan qal’a” davlat muzey-qo‘riqxonasi hududida 4 ta va Xiva shahrida joylashgan “Nurullaboy” majmuasida 1 ta turistlarga xizmat ko‘rsatish shoxobchasi o‘rnatildi.
Shuningdek, ko‘p sonli turistlarning murojaatlaridan kelib chiqqan holda Xiva shahrining “Ichan qal’a” davlat muzey-qo‘riqxonasi hududida turistlarning narsa va buyumlarini vaqtinchalik saqlab turishga mo‘ljallangan 20 ta javondan iborat bo‘lgan 1 ta shoxobcha o‘rnatildi.
Endilikda turistlar xavfsizligini ta’minlash sohasidagi xorijiy davlatlar tajribasini o‘rganish, o‘zaro tajriba almashish hamda bevosita faoliyatga tatbiq qilish uchun viloyat IIB Xavfsiz turizmni ta’minlash boshqarmasi xodimlarini xorijga xizmat safarlarini uyushtirish rejalashtirilgan.
Izoh (0)