Жорий йилнинг июнь ойида Хоразм вилояти ҳокимлиги томонидан вилоят ИИБ Хавфсиз туризмни таъминлаш бошқармасига хизматда фойдаланиш учун 10 та скутер ва 3 та Nexia русумли енгил автомашина топширилди. Бу ҳақда Хоразм вилояти туризмни ривожлантириш департаменти матбуот хизмати маълум қилади.
Мазкур техника воситалари ходимларнинг хизмат олиб боришлари жараёнида узоқ масофаларга тезкорлик билан етиб боришида ва вилоятга ташриф буюраётган сайёҳларнинг муаммоларини ижобий ҳал қилишда катта имкониятлар яратади.
Бундан ташқари, Хоразм вилоятининг Хива шаҳрида жойлашган «Ичан қалъа» давлат музей-қўриқхонасига доимий равишда кўплаб туристлар ташриф буюраётганлигини инобатга олган ҳолда, «Ичан қалъа» давлат музей-қўриқхонаси ҳудудида 4 та ва Хива шаҳрида жойлашган «Нуруллабой» мажмуасида 1 та туристларга хизмат кўрсатиш шохобчаси ўрнатилди.
Шунингдек, кўп сонли туристларнинг мурожаатларидан келиб чиққан ҳолда Хива шаҳрининг «Ичан қалъа» давлат музей-қўриқхонаси ҳудудида туристларнинг нарса ва буюмларини вақтинчалик сақлаб туришга мўлжалланган 20 та жавондан иборат бўлган 1 та шохобча ўрнатилди.
Эндиликда туристлар хавфсизлигини таъминлаш соҳасидаги хорижий давлатлар тажрибасини ўрганиш, ўзаро тажриба алмашиш ҳамда бевосита фаолиятга татбиқ қилиш учун вилоят ИИБ Хавфсиз туризмни таъминлаш бошқармаси ходимларини хорижга хизмат сафарларини уюштириш режалаштирилган.
Изоҳ (0)