Investitsiyalar va tashqi savdo vaziri Sardor Umurzakov boshchiligida O‘zbekiston—Hindiston qo‘mitasining ikki tomonlama loyihalarni amaliy bajarilishini muvofiqlashtirish va rag‘batlantirish bo‘yicha o‘zbek tomonining birinchi yig‘ilishi bo‘lib o‘tdi. Bu haqda vazirlik matbuot xizmati ma’lum qildi.
Yig‘ilishda O‘zbekistonning Hindistondagi elchisi Farhod Arziyev, qo‘mita tarkibiga kiruvchi vazirlik va idoralar rahbarlari, shuningdek, vazirlikning mas’ul xodimlari va Andijon viloyati hokimligi vakillari ishtirok etgan.
Qo‘mita yig‘ilishi Hindistonning yetakchi kompaniyalari bilan hamkorlikda amalga oshiriladigan har bir loyiha bo‘yicha muammolarni batafsil tahlil qilishga bag‘ishlangan. Alohida ravishda “Andijon—Farm” erkin iqtisodiy zonasi hududida amalga oshiriladigan loyihalar ko‘rib chiqilgan.
Shuningdek, investitsiya loyihalari va savdo aloqalarini amalga oshirish bo‘yicha yangi kelishuvlarga erishish, o‘zaro savdo hajmini oshirish yo‘lidagi to‘siqlarni hisobga olgan holda Hindiston bilan munosabatlarni yanada rivojlantirish bo‘yicha takliflar ko‘rib chiqilgan.
Uchrashuv natijasida har bir loyiha va hindistonlik sheriklar bilan kelishuv bo‘yicha rejalashtirilgan natijalarga erishish uchun o‘z vaqtida bajarilishi kerak bo‘lgan aniq chora-tadbirlar belgilangan.
Izoh (0)