Oliy Majlis Senati a’zosi, Jalaquduq tumani hokimi Sodiqjon Turdiyev salomatligi tufayli o‘z arizasiga muvofiq vazifasidan ozod etildi. Bu haqda Andijon viloyati hokimi Shuhratbek Abdurahmonov ishtirokida Andijon shahridagi Yoshlar markazida o‘tkazilgan apparat yig‘ilishida ma’lum qilindi, deya xabar bermoqda “Daryo” muxbiri.
— So‘nggi paytlarda Sodiqjon aka ko‘p kasal bo‘lmoqda. Bir necha oydan buyon vazifasidan ozod etishni iltimos qilib kelardi. Salomatligi ko‘tarmaganligi bois iltimosini qabul qildik. O‘rniga tuman hokimining birinchi o‘rinbosari Zokirjon Davronovni vaqtincha hokim vazifasini bajaruvchi etib tayinladik, — deya izoh berdi viloyat hokimi.
Zokirjon Davronov 1968-yilda Jalaquduq tumanida tug‘ilgan, ma’lumoti bo‘yicha mutaxassisligi iqtisodchi, moliyachi. 1997-yilda Andijon iqtisodiyot va boshqaruv instituti hamda 1999-yilda O‘zbekiston Bank-moliya akademiyasini tamomlagan. Turli yillarda Jalaquduq, Izboskan tumanlari, Qorasuv shahar soliq inspeksiyasi, Andijon shahar byudjetdan tashqari pensiya jamg‘armasi, Qo‘rg‘ontepa tumani g‘azna bo‘limi boshlig‘i lavozimlarida ishlagan. 2017-yildan buyon Jalaquduq tumani hokimining birinchi o‘rinbosari vazifasida ishlab kelayotgandi.
Ma’lumot uchun, Sodiqjon Turdiyev 2017-yilning avgust oyidan buyon Jalaquduq tumanida rahbarlik qilib kelayotgandi. Bunga qadar esa Tadbirkorlar va ishbilarmonlar harakati — O‘zbekiston Liberal-demokratik partiyasi siyosiy kengashi ijroiya qo‘mitasi raisi, O‘zbekiston Fermerlar kengashi raisi vazifalarida ishlagan.
Izoh (0)