Omadsiz “Real”, kutilmagan yetakchi — “Sevilya”, Messi va Suaressiz qolgan “Barselona”ning g‘alabasi. La Ligada tur tafsilotlari

23—25-avgust kunlari Ispaniya chempionatida 2-tur o‘yinlari bo‘lib o‘tdi. “Daryo” qiziqarli kurashlarga boy bo‘lgan tur tafsilotlari bilan o‘rtoqlashadi.

“Granada” — “Sevilya”

Juma oqshomida “Sevilya” klubi Granadaga safar qildi. Unda Xoan Xordanning yagona goli andalusiyaliklarga g‘alaba keltirdi. Shu tariqa, ketma-ket ikki turda g‘alabani tantana qilgan Xulen Lopetegi shogirdlari turnir jadvalida peshqadamga aylanib oldi.

Biroq ushbu uchrashuvda “Sevilya” “Real”dan ijaraga olgan Serxio Regilonni yo‘qotdi. 1-tur qahramoniga aylangan himoyachi jarohat sabab safdan chiqdi.

“Real” — “Valyadolid”

Birinchi turda ajoyib g‘alabaga erishgan “Real” o‘z maydonida “Valyadolid”ni qabul qildi. Uchrashuvda katta tashabbusga ega bo‘lgan madridliklar o‘yinni o‘z foydasiga hal qila olmadi.

Bahsning so‘nggi daqiqalari dramatik ruhda kechdi. 82-daqiqada Karim Benzema “Santyago Bernabeu” uzoq kutgan golni urdi, biroq “qaymoqranglilar”ning xursandchiligi uzoqqa cho‘zilmadi. 88-daqiqada Serxio Gvardiola mehmonlarga bir ochko keltirgan golga muallif bo‘ldi.

“Real” tarkibdagi yo‘qotishlar o‘z so‘zini aytmay qolmadi. Asosiy yetakchilardan biriga aylanishi kutilayotgan Eden Azarning yo‘qligi va 60 million yevroga xarid qilingan Luka Yovichning hali jamoaga kirishib keta olmagani sababli ham hujumda rang-baranglik ko‘rinmadi. “Valyadolid” esa ketma-ket ikkinchi o‘yinda ham xarakter ko‘rsatgan holda sensetsion natija qayd etdi.

“Leganes” — “Atletiko”

“Atletiko” mazkur turda “Leganes” maydonida mehmon bo‘ldi va o‘z uslubida muvaffaqiyat qozondi. Keskin va murosasiz kechgan uchrashuv taqdirini Vitoloning yagona goli hal qildi. U zaxiradan maydonga tushganiga 1 daqiqa o‘tmasidan Joau Feliksning uzatmasini golga aylantira oldi.

Mavsumlar ralig‘ida sermahsullik namoyish qilgan Diyego Simeone shogirdlari rasmiy bahslarda buni amalga oshira olmayapti. Dastlabki turda ham “matraschilar” minimal hisobdagi g‘alaba bilan uch ochkoga ega chiqqandi.

“Barselona” — “Betis”

Bilbaodagi alamli mag‘lubiyatdan keyin amaldagi chempion o‘z maydonida “Betis”ni qabul qildi. Asosiy hujum uchligi — Lionel Messi, Luis Suares va Usmon Dembele mazkur uchrashuvda ishtirok etmasligi bois mezbon jamoa muxlislarida katta xavotir bor edi. Bu esa Antuan Grizmanning “katta sahna”ga chiqishiga zamin yaratdi.

O‘yin debyuti sevilyaliklar uchun omadl keldi, yozgi transfer oynasida sotib olingan Nabil Fekir 15-daqiqada mehmonlarni oldinga olib chiqdi. Biroq bunga katalonlar beshta to‘p bilan javob qaytardi. Tanaffus arafasida hisobni tenglashtirgan fransiyalik futbolchi, ikkinchi bo‘lim debyutida qoyilmaqom zarbasi bilan mehmonlar darvozasini ishg‘ol qildi. Shundan keyin Karles Peres, Jordi Alba va Arturo Vidal bir martadan “Betis” darvozasini aniq nishonga oldi. Grizmann ikkita gol urish bilan birga bitta golga assistentlik ham qildi.

Boshqa uchrashuvlar

O‘tgan turda “Eybar”ni mag‘lub etgan yangi mavsum debyutanti — “Malyorka” bu safar “Real Sosyedad”ni o‘zida qabul qildi. Mazkur bahsda “Real”dan ijaraga olingan hujumchi Martin Edegorning goli San-sebastianliklarga g‘alaba olib keldi.

“Selta” 2-turni ham o‘z maydonida o‘tkazdi, bu safar Vigoda “Valensiya” mehmon bo‘ldi. Mehmonlar kutilmaganda bu turda ham g‘alaba qozona olmadi. O‘tgan tur qahramoni — “Atletik” mazkur turda “Xetafe” bilan durang o‘ynab qo‘ydi.

Tur raqamlarda

Ikkinchi turdan keyin faqat ikkita jamoa — “Sevilya” va “Atletiko” 100 foizlik natija bilan turnir jadvalida peshqadam bo‘lib turibdi. Ularning ketidan oltita jamoa 4 ochko bilan ketmoqda. Yana ikki klub (“Betis”, “Leganes”) hali bir ochko ham qo‘lga kiritmadi.

Bu turda eng ko‘p gol “Barselona” — “Betis” uchrashuvida (7 ta) qayd etildi, shuningdek, turdagi yagona yirik hisob ham shu o‘yinda bo‘ldi. “Levante” — “Vilyarreal” bahsida uchta to‘p kiritildi. Qolgan o‘yinlarda urilgan gollar soni ikkitadan oshmadi.

Ikkita bellashuv esa 0:0 hisobi bilan yakunlandi.

Musobaqa jadvali

To‘purarlar ro‘yxati

1. Lorenso Moron — 2 ta gol
2. Xerar Moreno — 2 ta gol
3. Karim Benzema — 2 ta gol
4. Antuan Grizmann — 2 ta gol
5. Serxio Gvardiola — 2 ta gol
6. Roxer Marti — 2 ta gol