24—26-avgust kunlari futbol bo‘yicha Angliya Premyer ligasida 3-tur o‘yinlari o‘tkazildi. Qiziqarli va keskin kurashlarga boy o‘tgan tur tafsilotlarini “Daryo” an’anaga muvofiq muxlislarga taqdim etadi.
“Norvich”—“Chelsi”
Dastlabki 2 turda atigi 1 ochko jamg‘argan Frenk Lempard shogirdlari o‘tgan o‘yinda g‘alabaga erishgan “Norvich” mehmoni bo‘ldi. London klubi uchun o‘yin omadli boshlandi. “Aristokratlar”ning yangi 9-raqami Temmi Abraham 3-daqiqadayoq “Norvich” darvozasini ishg‘ol qildi. Biroq Lempardning quvonchi xuddi jamoasiniki kabi uzoqqa cho‘zilmadi. Oradan uch daqiqa o‘tib APLda to‘purar bo‘lib turgan Teyemu Pukkining uzatmasidan so‘ng Todd Kantuell Kepa darvozasini ishg‘ol qildi. 17-daqiqada esa o‘tgan o‘yinda ham gol urgan Meyson Maunt “Chelsi”ni hisobda oldinga olib chiqdi. Oradan 13 daqiqa o‘tib, Pukkining o‘zi bu safar hisobni tenglashtirdi. Ikkinchi bo‘limning 68-daqiqasida yana Abraham katta sahnaga chiqdi. 21 yoshli hujumchi Mateo Kovachichning ajoyib uzatmasini golga aylantirdi. Shu tariqa “Chelsi” Premyer ligada Frenk Lempard qo‘l ostidagi dastlabki g‘alabasini qo‘lga kiritdi.
“Manchester Yunayted”—“Kristal Pelas”
Mavsumni yomon boshlamagan Ole-Gunnar Sulsher jamoasi 3-tur doirasida “Kristal Pelas”ni o‘z maydonida qabul qildi. Bellashuvda hisobni mehmonlar 32-daqiqaga kelib ochdi. Darvozabon Visente Guaitaning uzatmasini Jeffri Shlupp oldinga intilgan Jordan Ayyuga tashlab berdi. Afrikalik futbolchi esa David de Xeani osonlik bilan dog‘da qoldirishga erishdi. Birinchi bo‘limda muxlislar boshqa gol ko‘rmadi. 70-daqiqada hakam mehmonlar darvozasiga penalti belgilandi. Uni esa Markus Reshford aniq amalga oshira olmadi. To‘p darvoza ustuniga tegib, maydon tashqarisiga yo‘l oldi. Qayd etish joiz, o‘tgan o‘yinda Pol Pogba ham 11 metrlik jarima zarbasini ko‘kka sovurgandi. O‘yinning kuliminatsion nuqtasi esa so‘nggi daqiqalarga to‘g‘ri keldi. Avvaliga Deniel Jeyms chiroyli goli bilan hisobni tenglashtirgan bo‘lsa, oradan 4 daqiqa o‘tib, Zaha—van Anholt kombinatsiyasini niderlandiyalik futbolchining o‘zi gol bilan yakunladi. Shu tariqa “Manchester Yunayted” barcha musobaqalarni hisobga olganda 18 ta o‘yinda ilk bor “burgutlar”ga mag‘lub bo‘ldi.
“Liverpul”—“Arsenal”
Musobaqaning ortda qolgan 2 turida 100 foizlik natija qayd etgan Mersisayd va London klubi “Enfild” stadionida musobaqaning yakka hokimligi uchun maydonga tushdi. O‘yindagi 4 ta goldan dastlabki 3 tasi mezbonlar hisobiga yozildi. Avvaliga Joel Matip hisobni ochgan bo‘lsa, ikkinchi bo‘lim avvalida David Luisning qo‘polligi sabab belgilangan penaltini Muhammad Saloh “Arsenal” darvozasiga joylab qo‘ydi. Oradan 9 daqiqa o‘tib, Saloh Fabinyoning uzatmasidan so‘ng “to‘pchilar” himoyachilaridan birin-ketin qochib ketdi va Bernd Leno darvozasiga o‘yindagi o‘zining ikkinchi golini urdi. “Arsenal” yagona goliga esa 85-daqiqada urugvaylik Lukas Torreyra mualliflik qildi. Qayd etish joiz, Torreyra 61-daqiqada Dani Sebalyosning o‘rniga zaxiradan maydonga tushgandi.
Yurgen Klopp jamoasi 3-turdan so‘ng yo‘qotishsiz odimlayotgan yagona jamoa bo‘lib turibdi.
“Bornmut”—“Manchester Siti”
O‘tgan turda “Tottenhem” bilan durang o‘ynab qo‘ygan Xosep Gvardiola shogirdlari bu safar “Bornmut” maydoniga safar qildi. Uchrashuvda hisobni 15-daqiqada Kevin de Bryuynening uzatmasidan so‘ng Serxio Aguero ochdi. 43-daqiqada esa Rahim Sterling David Silvaning uzatmasini golga aylantirib, “Siti”ning ustunligini mustahkamladi. Mavsum avvalida “Liverpul”dan ijaraga olingan Harri Uilson esa bo‘lim so‘ngida Ederson darvozasiga jarima zarbasidan qoyilmaqom gol urishga erishdi. O‘yinga yakuniy nuqtani qo‘yish esa Serxio Agueroga nasib qildi. David Silvaning uzatmasini argentinalik hujumchi ko‘kka sovurmadi. Natijada “Manchester Siti” g‘alabani tantana qildi va o‘z hisobidagi ochkolar sonini 7 taga yetkazib, musobaqa jadvalida 2-o‘ringa ko‘tarilib oldi.
“Tottenhem”—“Nyukasl”
Turning yana bir sensatsion natijasi Londonda qayd etildi. Maurisio Pochettino qo‘l ostidagi “Tottenhem” 3-turga kelib, mavsumdagi ilk mag‘lubiyatini qabul qilishga majbur bo‘ldi. “Shporlar” o‘z maydonida “Nyukasl”ni qabul qilib, braziliyalik Joelintonning 27-daqiqada kiritgan goli evaziga yutqazdi. Shu kuni to‘pga egalik qilish bo‘yicha raqibiga master-klass ko‘rsatgan mezbonlarning gol urish borasida omadi kelmadi, xolos.
Tur raqamlarda
- 10 uchrashuvda jami 30 ta gol urildi
- 12 ta gol mezbonlar, 18 tasi esa mehmonlar hisobiga yozildi
- Eng sermahsul bahs: “Norvich” — “Chelsi” 2:3
- Faqat 1 ta o‘yinda durang qayd etildi: “Vulverhempton” — “Byornli” 1:1
- Faqatgina 9 ta o‘yindan 2 tasida mezbonlar g‘alaba qozondi
- 4 nafar futbolchi dublga erishdi: Temmi Abraham, Muhammad Saloh, Serxio Aguero, Sebastian Aller
- Ortda qolgan uch turdan so‘ng ochko yo‘qotmagan bitta klub qoldi — “Liverpul”
Uchrashuvlarda kiritilgan barcha gollarni @daryo_sport Telegram kanalida tomosha qilishingiz mumkin.
APL
3-tur bahslari
23-avgust, juma
“Aston Villa”—“Everton” 2:0
Gollar: 1:0 — 21 Uesli, 2:0 — 90 al-G‘oziy24-avgust, shanba
“Norvich”—“Chelsi” 2:3
Gollar: 0:1 — 3 Abraham, 1:1 — 6 Kentuell, 1:2 — 17 Maunt, 2:2 — 30 Pukki, 2:3 — 68 Abraham“Brayton”—“Sauthempton” 0:2
Gollar: 0:1 — 55 Jenepo, 0:2 — 90 Redmond“Manchester Yunayted”—“Kristal Pelas” 1:2
Gol: 0:1 — 32 Ayyu, 1:1 — 89 Jeyms, 1:2 — 90 van Anholt“Sheffild Yunayted”—“Lester” 1:2
Gollar: 0:1 — 38 Vardi, 1:1 — 62 Makberni, 1:2 — 70 Barns“Uotford”—“Vest Hem” 1:3
Gollar: 0:1 — 3, penalti, Nobl, 1:1 — 17 Grey, 1:2 — 64 Aller, 1:3 — 73 Aller“Liverpul”—“Arsenal” 3:1
Gollar: 1:0 — 41 Matip, 2:0 — 49, penalti, Saloh, 3:0 — 58 Saloh, 3:1 — 85 Torreyra25-avgust, yakshanba
“Bornmut”—“Manchester Siti” 1:3
Gollar: 0:1 — 15 Aguero, 0:2 — 43 Sterling, 1:2 — 45 Uilson, 1:3 — 64 Aguero“Vulverhempton”—“Byornli” 1:1
Gol: 0:1 — 13 Barns, 1:1 — 90, penalti, Himenes“Tottenhem”—“Nyukasl” 0:1
Gol: 0:1 — 27 Joelinton
To‘purarlar ro‘yxati
- Rahim Sterling (“Manchester Siti”) — 5 ta gol
- Teyemu Pukki (“Norvich”) — 5 ta gol
- Serxio Aguero (“Manchester Siti”) — 4 ta gol
- Eshli Barns (“Byornli”) — 4 ta gol
- Muhammad Saloh (“Liverpul”) — 3 ta gol
Izoh (0)