Buxoro neftni qayta ishlash zavodi modernizatsiyasi uchun 553 mln dollar ajratiladi

2020-yilda Buxoro neftni qayta ishlash zavodida 553 million AQSh dollariga teng modernizatsiya loyihasi amalga oshiriladi. Bu haqda matbuot brifingida zavod direktorining birinchi o‘rinbosari Baxtiyor Mustafoyev ma’lum qildi, deya xabar beradi “Daryo” muxbiri.

Mazkur loyiha amalga oshirilgach, 1997-yilda asos solingan zavod ilk bor texnologik jihatdan yangilanadi. Shuningdek, yiliga 2,5 million tonna neft va gaz kondensati qayta ishlanadi. 1,2 million tonna “Yevro-5” standartidagi benzin, 200 ming tonna aviakerosin, 750 ming tonna dizel yoqilg‘isi va 30 ming tonna mazut ishlab chiqarishga erishiladi.

Uglevodorod xomashyosi hajmi ortidan neftni qayta ishlash zavodi bandligi 62.2 foizni tashkil etgan. Shu bois, zavodni modernizatsiya va qayta qurish maqsadida davlat ahamiyatiga molik yettita yirik loyihani amalga oshirish ko‘zda tutilgan.

Mutaxassislarning aytishicha, bu loyihalar uch bosqichda bajariladi. Birinchi bosqichda joriy yilning o‘zida ishlab chiqarish hajmining 20 foizi Yevro-4,5 standartlari va 80 foizi Yevro-3 standarti talablariga javob beradigan dizel yoqilg‘isini ishlab chiqarish ta’minlanadi. 2019—2022-yillarga mo‘ljallangan ikkinchi bosqichning amalga oshirilishi natijasida Yevro-4, Yevro-5 talablariga javob beradigan yuqori oktanli AI-91, AI-93, AI-95 avtobenzinlarni ishlab chiqarish hajmi ortadi va 100 foiz Yevro-5 standarti bo‘yicha dizel yoqilg‘isini ishlab chiqarish ta’minlanadi.

Uchinchi bosqich esa 2024-2025 yillarga mo‘ljallangan. Bunda qayta ishlash hajmini 79 foizdan 95 foizgacha, ochiq tusdagi mahsulotlar hajmi esa 77 foizdan 92 foizgacha oshadi.

Hozirgi kunda loyihani amalga oshirish uchun kompaniya tomonidan to‘g‘ridan-to‘g‘ri investitsiyalarni jalb qilish imkoniyati ishlab chiqilgan. “Kazmunaygaz” MK AJ kompaniyasi va “SKE&C” kompaniyasi tomonidan tayyorlangan modernizatsiya konsepsiyasi orqali ishlab chiqarish quvvatini 4 million tonnaga yetkazish ko‘zda tutilmoqda.

— Janubiy Koreyaning SK Engineering & Construction (SKE&C) kompaniyasi zavodni modernizatsiya qiladi. O‘z o‘rnida, zavod Markaziy Osiyodagi ilk ekologik jihatdan toza neft mahsulotlarini ishlab chiqara boshlaydi. Mazkur modernizatsiya ishlari benzin, dizel yoqilg‘isi kabi mahsulotlar sifatini yaxshilash imkonini yaratadi, — dedi Baxtiyor Mustafoyev.