Sirdaryo viloyatida Bandlik va mehnat munosabatlari vazirligi homiyligida viloyatning 8 ta tumanida 36 ming hasharchiga mo‘ljallangan 90 ta “Dala hasharchilar shaharchasi” tashkil etiladi. Bu haqda viloyat hokimligi axborot xizmati ma’lum qildi.
Jumladan, Boyovut tumanida 20 ta, Guliston tumanida 15 ta, Sayxunobod tumanida 23 ta, Sirdaryo tumanida 23 ta va Xovos tumanida 9 ta dala hasharchilar shaharchasi barpo etiladi. Shaharchaning har birida ko‘ngilli hasharchilar yotoqxonalari, madaniyat, tibbiyot xonasi, kompyuter xonalaridan tortib oshxona, omborxona, yuvinish xonalarigacha bo‘ladi.
Hasharchilarga bu yerda huddi mehmonxonalardagidek xizmat ko‘rsatiladi.
Xabarda aytilishicha, palatkali yotoqxonalarda yangi choyshab, ko‘rpa-yostiq, yumshoq o‘rindiqlarlargacha jihozlab qo‘yilgan. Ushbu palatkalarda videoproyektor, badiiy adabiyotlar, stol o‘yinlari bilan jihozlangan madaniy dam olish chodirlari hamda zarur texnikalar (kompyuter, printer) va statsionar mobil aloqa bilan jihozlangan axborot-resurs markazi tashkil etildi. Hasharchilar uchun yuqori tezlikda ishlovchi internet, Wi-Fi tarmoqlari ham ishga tushiriladi.
Izoh (0)