Бухоро нефтни қайта ишлаш заводи модернизацияси учун 553 млн доллар ажратилади

2020 йилда Бухоро нефтни қайта ишлаш заводида 553 миллион АҚШ долларига тенг модернизация лойиҳаси амалга оширилади. Бу ҳақда матбуот брифингида завод директорининг биринчи ўринбосари Бахтиёр Мустафоев маълум қилди, дея хабар беради «Дарё» мухбири.

Мазкур лойиҳа амалга оширилгач, 1997 йилда асос солинган завод илк бор технологик жиҳатдан янгиланади. Шунингдек, йилига 2,5 миллион тонна нефть ва газ конденсати қайта ишланади. 1,2 миллион тонна «Евро-5» стандартидаги бензин, 200 минг тонна авиакеросин, 750 минг тонна дизел ёқилғиси ва 30 минг тонна мазут ишлаб чиқаришга эришилади.

Углеводород хом ашёси ҳажми ортидан нефтни қайта ишлаш заводи бандлиги 62.2 фоизни ташкил этган. Шу боис, заводни модернизация ва қайта қуриш мақсадида давлат аҳамиятига молик еттита йирик лойиҳани амалга ошириш кўзда тутилган.

Мутахассисларнинг айтишича, бу лойиҳалар уч босқичда бажарилади. Биринчи босқичда жорий йилнинг ўзида ишлаб чиқариш ҳажмининг 20 фоизи Евро-4,5 стандартлари ва 80 фоизи Евро-3 стандарти талабларига жавоб берадиган дизел ёқилғисини ишлаб чиқариш таъминланади. 2019—2022 йилларга мўлжалланган иккинчи босқичнинг амалга оширилиши натижасида Евро-4, Евро-5 талабларига жавоб берадиган юқори октанли АИ-91, АИ-93, АИ-95 автобензинларни ишлаб чиқариш ҳажми ортади ва 100 фоиз Евро-5 стандарти бўйича дизел ёқилғисини ишлаб чиқариш таъминланади.

Учинчи босқич эса 2024-2025 йилларга мўлжалланган. Бунда қайта ишлаш ҳажмини 79 фоиздан 95 фоизгача, очиқ тусдаги маҳсулотлар ҳажми эса 77 фоиздан 92 фоизгача ошади.

Ҳозирги кунда лойиҳани амалга ошириш учун компания томонидан тўғридан-тўғри инвестицияларни жалб қилиш имконияти ишлаб чиқилган. «Казмунайгаз» МК АЖ компанияси ва «СКЕ&C» компанияси томонидан тайёрланган модернизация концепцияси орқали ишлаб чиқариш қувватини 4 миллион тоннага етказиш кўзда тутилмоқда.

— Жанубий Кореянинг СК Engineering & Construction (СКЕ&C) компанияси заводни модернизация қилади. Ўз ўрнида, завод Марказий Осиёдаги илк экологик жиҳатдан тоза нефть маҳсулотларини ишлаб чиқара бошлайди. Мазкур модернизация ишлари бензин, дизел ёқилғиси каби маҳсулотлар сифатини яхшилаш имконини яратади, — деди Бахтиёр Мустафоев.