SSV bosh toksikologi va gematologi zaharlangan o‘zbekistonliklarga yordam ko‘rsatish uchun Samaraga yo‘l oldi
2019-yil 17-avgust kuni Sog‘liqni saqlash vazirligi bosh toksikologi Rustam Akalayev va bosh gematologi Hamida Kazakbayeva “Koshelevskiy posad” korxonasida ishlagan va iyul oyida zaharlanish tashxisi bilan kasalxonaga yotqizilib, hozirdan davolanishni davom ettirayotgan 48 nafar O‘zbekiston fuqarosiga yordam ko‘rsatish uchun Samara viloyatiga uchib ketadi. Bu haqda TIV matbuot xizmati ma’lum qildi.
4 nafar og‘ir ahvolda bo‘lgan jabrlanuvchi (Og‘abek Artikov, Islomboy Qo‘chqorov, Farhod Hayitov, Omonboy Ro‘zimov) 16-avgust kuni davolanishni davom ettirish uchun Rossiya FVVning maxsus samolyotida Moskva shahridagi Gematologiya tibbiy tadqiqotlar markaziga olib kelindi. Rossiya poytaxtida ularni O‘zbekiston elchixonasi va Tashqi mehnat migratsiyasi masalalari agentligi vakolatxonasi xodimlari kutib oldi.
44 nafar O‘zbekiston fuqarosi hamon Samara viloyati klinik shifoxonasi va 1-son Tolyatti shahar klinik shifoxonasida bo‘lib turibdi.
