10 август, шанба куни Тошкент шаҳрида UNWTO ва ICCA вакиллари иштирокида бизнес учрашувлар саноати (MICE туризм) бўйича маҳорат дарси бўлиб ўтди. Тадбир Gastro Bazaar—2019 халқаро гастрономик фестивали доирасида ташкил этилди. Бу ҳақда Туризмни ривожлантириш қўмитаси матбуот хизмати хабар берди.
Халқаро экспертлар иштирокидаги маҳорат дарси Туризмни ривожлантириш давлат қўмитаси ташаббуси билан ўтказилди.
Тренинг мақсади — мамлакатда ўтказилаётган халқаро бизнес тадбирлар даражасини ошириш бўйича дунёнинг етакчи мутахассислари тажрибасини ўрганиш, Ўзбекистоннинг MICE туризм салоҳиятини ошириш ва лойиҳаларни амалга оширишдан тушадиган даромадларни кўпайтириш. Меҳмонхона хизматини кўрсатувчи хўжалик субъектлари ҳамда туроператорлардан иборат тадбир иштирокчилари ўз йўналишида ICCA ва UNWTO академияси вакиллари томонидан халқаро даражали тадбирларни ўтказиш бўйича бепул таълим ҳамда зарур билимларни олиш имконига эга бўлди.
Маҳорат дарслари UNWTO Аффиллик дастурининг доимий вакили Дмитрий Илин (Испания), ICCA Европа минтақавий директори Элиф Балчи Фисиноглу (Туркия) томонидан ўтилди, Туризмни ривожлантириш давлат қўмитаси ҳузуридаги «Ипак йўли» офиси раҳбари Миртолиб Мирзоҳидов тадбирга модераторлик қилди.
UNWTO доимий вакили Дмитрий Илиннинг сўзларига кўра, учрашувлар саноати туризмнинг энг муҳим сегментларидан бири ҳисобланади. Зеро, у иқтисодиётга жуда катта фойда келтиради — мавсумийлик тушунчасини камайтиради, туристик йўналишларнинг янгиланишига туртки беради ва умуман, инновациялар ва ижодий ёндашувга ижобий таъсир кўрсатади.
«Бизнинг асосий мақсадимиз — бизнес учрашувларни ташкил қилиш бўйича давлат туристик ташкилотлари билан тадбиркорлик субъектлари ўртасидаги ҳамкорлик алоқаларини кенгайтириш. Ўзбекистон учун бу биринчи тажриба, бундай маҳорат дарслари мамлакат туристик бизнесини янги даражага олиб чиқади», — деди Элиф Балчи.
Тренинг давомида иштирокчилар MICE-туризм тушунчаси ва унинг асосий тамойиллари, замонавий тенденциялар ҳамда бу йўналишдаги иқтисодий кўрсаткичлар билан танишди, шунингдек, ўзларини қизиқтирган саволларга халқаро экспертлардан тегишли жавоблар олди. Туркия гастрономик туризм уюшмаси бошқарув раиси Гўркан Бўзтепе тадбир доирасида MICE-туризмни ривожлантиришда гастрономик туризмнинг аҳамиятига доир интервью берди:
«Бугун Гастрономик туризм фестивали доирасида MICE-туризм маҳорат дарси ўтказилмоқда. Таъкидлаш жоизки, MICE-туризмни ривожлантиришда гастрономик туризм ҳам жуда муҳим. Нима учун дейсизми? Чунки MICE-туризм мақсадида келаётган одамлар асосан юксак дидли ва сердаромад одамлардир ҳамда улар ўзлари хоҳлаган таомлардан татиб кўриш учун ҳамма нарсага тайёр. Бундай кишилар келган жойида овқат ейиши табиий ва қайд этиш лозимки, уларнинг баъзилари ҳатто оилалари билан ҳам келишади. Улар учун миллий маданият ва анъаналарга мос муҳитда овқатланиш муҳим аҳамият касб этади, шу жиҳатдан MICE-туризм ва гастрономик туризм бир-бирига боғлиқдир. Шундай экан, бу каби фестивалларни ўтказиш жуда муҳим».
Изоҳ (0)