O‘zbekiston iqtisodiyotini rivojlantirishning hozirgi zamonaviy bosqichida elektr energetikasi sohasidagi asosiy vazifa iste’molchilarning elektr energiyasiga o‘sib borayotgan ehtiyojlarini qondirish dolzarb masala hisoblanadi, deb xabar beradi Energetika vazirligi matbuot xizmati.
Shu bois mamlakatdagi mavjud elektr stansiyalari va tarmoqlarini modernizatsiya va rekonstruksiya qilish, qayta tiklanadigan energiya manbalaridan foydalanishni rivojlantirish, yuqori samarali energiya ishlab chiqarish texnologiyalariga asoslangan yangi ishlab chiqarish quvvatlarini qurish, elektr energiyasini hisobga olish tizimini takomillashtirish va yoqilg‘i-energetika resurslarini diversifikatsiya qilish bugungi kunning asosiy vazifalaridan, deyiladi xabarda.
O‘zbekistonda bir qator loyihalarning jadal sur’atlarda amalga oshirilayotgani ham aynan shunday ezgu maqsadlarga qaratilgani bilan ahamiyatli.
Xususan, Qoraqalpog‘iston Respublikasida bunyod etilayotgan Taxiatosh issiqlik elektr stansiyasi ham bu kabi loyihalardan biri. Mazkur yirik inshoot quvvati 230 va 280 MVt bo‘lgan ikkita bug‘-gaz qurilmasidan iborat bo‘lib, u 2020-yilda ishga tushiriladi.
Loyihaning umumiy quvvati 510 MVt, umumiy qiymati — 678,2 million dollarni tashkil etadi. Ikkita bug‘-gaz qurilmasining ishga tushirilishi Taxiatosh IESga elektr energiyasiga o‘sib borayotgan talabni qondirish bilan birga mavjud uskunalarda sarflanayotgan yoqilg‘ini yiliga 488,6 million metr kub yoqilg‘i tejash imkonini beradi.
Ushbu stansiyaning samaradorligi 31,21 dan 49,7% gacha oshadi, yillik elektr energiyasi ishlab chiqarish hajmi 3,6 milliard kilovatt soat, yillik issiqlik ishlab chiqarish hajmi esa 139 000 Gkaldir. IES ishga tushgach, bu yerda 97 yangi ish o‘rni yaratiladi.
Ma’lumot o‘rnida, bu loyihani amaliyotga tatbiq etish uchun bosh pudratchi “O‘zbekenergo” AJ va “Consortiumof Hyundai Engineering Co. Ltd.” hamda “Hyundai Engineering & Construction Co. Ltd” hamkorligida “tayyor holda topshirish” tamoyili asosida shartnoma imzolangan.
Izoh (0)