Kecha, 3-avgust kuni, yilning eng nufuzli harbiy musobaqalaridan biri 5-Xalqaro armiya o‘yinlariga start berildi, deya xabar berdi Mudofaa vazirligi matbuot xizmati.
Bu yilgi xalqaro armiya o‘yinlari 3-avgustdan 18-avgustga qadar davom etadi. Musobaqalar dunyoning 10 davlatida — Ozarbayjon, Armaniston, Belarus, Hindiston, Eron, Qozog‘iston, Xitoy, Mo‘g‘uliston, O‘zbekiston va Rossiya jami 21 ta dala-o‘quv maydonida bo‘lib o‘tadi.
Moskva viloyatida joylashgan “Patriot” parkida bo‘lib o‘tgan tantanali ochilish marosimida O‘zbekiston Respublikasi nomidan mudofaa vazirining birinchi o‘rinbosari, Qurolli Kuchlar bosh shtab boshlig‘i general-mayor Pavel Ergashev va Mudofaa vazirligining “Alabino” dala-o‘quv maydonida bahslarga kirishish uchun shay turgan harbiy xizmatchilarning bir guruhi ishtirok etdi.
Tantanali ochilish marosimini Rossiya Federatsiyasi mudofaa vaziri armiya generali Sergey Shoygu o‘z nutqi bilan ochib berdi. Shundan so‘ng ishtirokchi davlatlar o‘z bayroqlari ostida sahnaga chiqib kelishdi.
Izoh (0)